په افغانستان کې د ملګرو ملتونو د مرستندویه پلاوي دفتر (یوناما) د دوشنبې په ورځ د (لړم په ۲۲ مه) اعلان وکړ چې دغه سازمان په غزه کې د ملګرو ملتونو د څه باندې ۱۰۰ مرستندویه کارکونکو د وژل کېدو له امله خپل بیرغ نیم ځوړند کړی دی.
یوناما په خپله اېکس پاڼه لیکلي چې په افغانستان کې د ملګرو ملتونو کارکونکو هم په غزه کې د خپلو همکارانو د وژل کېدو له امله یوه دقیقه چوپتیا غوره کړه.
له دې سره، فرانس پرېس خبري اژانس لیکلي چې په کابل کې د افغانستان له پاره د ملګرو ملتونو ځانګړې استازې روزا اتونبایوا او د هغې ۲۵۰ همکارانو د خواخوږۍ په دغو مراسمو کې برخه اخیستې ده.
پر غزې د اسراییل له بریدونو وروسته د مرستندویه ادارو د سلو کارکونکو ترڅنګ څه باندې ۱۱ زره کسان وژل شوي دي دي.
اسراییل وروسته له هغه پر غزې بریدونه پيل کړل چې حماس پر اسراییل په برید سره ۱۴۰۰ کسان ووژل او تر ۲۴۰ زیات نور یې برمته کړل.
سره له دې چې نړیوالو مرستندویه ادارو او یو شمیر هیوادونو په وار وار له اسراییل د اوربند غوښتنه کړې خو اسراییل وایي تر هغه به اوربند و نه کړي چې د حماس له خوا د دوی یرغمل شوي کسان خوشې شوي نه وي.
د غزې د عامې روغتیا وزارت په وینا، له هغه مهاله د اسراییلي پوځیانو په غچ اخستونکو بریدونو کې تر اوسه پورې څه باندې ۱۱ زره ولسي خلک وژل شوي چې ډېره برخه یې ماشومان دي.