ترکي رسنیو د دوشنبې په ورځ خبر ورکړی، چې د ترکیې د زونګولدک په ښار کې د ډبرو سکرو په کان کې یو افغان کډوال مړ شوی او د کار څښتن یې جسد یو ځنګل ته انتقال کړی او اور ورته اچولی دی. د ترکيې پوليسو د دې پېښې په تړاو دوه کسان نيولي دي.
د ترکیې پولیسو اعلان وکړ، چې له شپږو شکمنو کسانو څخه یې دوه چې د کان څښتنان دي، د قتل په تور نیولي دي.
د ۵۰ کلن وزیر محمد مړی د لړم په ۱۹مه د زونګولدک ښار په یوه ځنګله کې د مسافرو له خوا وموندل شو.
هغه د ډبرو سکرو په یوه ناقانونه کان کې کار کاوه.
تورنو اعتراف کړی، چې وزیر محمد په کار کې ناروغ شو او هملته ومړ.
دوی ویلي، چې د موضوع د پټولو په خاطر یې جسد سوځولی دی.
د دغه ښار د پولیسو لومړنۍ څېړنې ښيي چې دغه افغان کډوال په پټرولو سره سوخېدلی دی.
د پاکستان د مشرانو جرګې یو شمېر غړو د پاکستان پر موقت حکومت غږ کړی، چې د افغان کډوالو د ایستلو مساله دې راتلونکي انتخابي حکومت ته پرېږدي او د کډوالو د ایستلو لړۍ دې ژر تر ژره ودروي. دوی ویلي، چې دا حکومت د کډوالو د ایستلو د پرېکړې واک نه لري.
د پاکستان دولتي رسنیو د پاکستان د مشرانو جرګې(سېنېټ) د یو شمېر غړو په حواله ویلي، چې دوی د پاکستان سترې محکمې ته یو لیک استولی او پکې ویل شوي، چې د پاکستان موقت حکومت یوازې د ټاکنو او د پاکستان د ورځینو چارو د سمبالولو دنده پر غاړه لري او دغه حکومت د کډوالو د ایستلو د پرېکړې حق نه لري.
د مشرانو جرګې یوه غړي مشتاق احمد خان د مشرانو جرګې په غونډه کې ویلي، چې پخوا پاکستان افغانان د شوروي اتحاد پر وړاندې د خپلې دفاع ډال ګاڼه؛ مګر اوس یې په زوره له پاکستانه شړي.
بل خوا د مشرانو جرګې په غونډه کې طاهر بزنجو هم ورته څرګندونې کړي او ویلي یې دي، چې پاکستاني پولیس د قانوني او بې قانونه کډوالو تر منځ توپیر نه کوي او د ټولو پر وړاندې یو ډول ناوړه چلند کوي.
نوموړي زیاته کړې، که چېرې د پاکستان حکومت د ناامنۍ په برخه کې پر طالبانو نیوکه لري؛ نو اړتیا ده چې له طالبانو سره د خبرو مېز ته کېني؛ مګر هڅه دې نه کوي چې بدل یې له افغان کډوالو څخه واخلي.
په دې غونډه کې یو شمېر نورو سناتورانو هم د پاکستان د موقت حکومت پر پرېکړې نیوکې وکړې او ویې ویل، چې له افغان کډوالو سره د پاکستان د موقت حکومت چلند د شرم وړ دی.
دوی پر حکومت غږ کړی، چې ژر تر ژره دې دا ډول چلند ودروي او خپله ټوله پاملرنه دې د پاکستان راتلونکو ټاکنو ته واړوي.
بل خوا د پاکستان حکومت اعلان کړی، چې تر دې دمه ۲۲۰ زره ۳۹۸ بې اسناده افغان کډوال د تورخم او چمن له لارې افغانستان ستانه شوي دي.
د پاکستان دولتي راډیو ویلي، چې هره ورځ په زرګونو بې اسناده کډوال له دغو دوو لارو خپل هېواد ته ستنېږي.
د دغې رسنۍ د معلوماتو له مخې؛ د یکشنبې په ورځ ۳ زره ۴۳ تنه له ۳۱۲ موټرو سره افغانستان ته ستانه شول.
د تلي په ۱۱مه پاکستان هغو کډوالو ته چې د اوسېدو قانوني اجازه نه لري، په خپله خوښه د وتلو وخت ورکړ.
له دې وروسته د پاکستان کورنیو چارو وزارت کډوال په زوره شړي.
د پاکستان د موقت حکومت د اټکل له مخې؛ د دغې پرېکړې له اعلان مخکې په دغه هېواد کې شاوخوا یو میلیون او اوه سوه زره افغان کډوال په دغه هېواد کې د قانوني اسنادو له لرلو پرته اوسېدل.
د افغانستان د ازادۍ جبهې د دوشنبې په ورځ اعلان وکړ، چې د پروان ولایت په جبل سراج کلا کې یې د طالبانو پر یوې قرارګاه برید کړی دی. یادې جبهې د دوشنبې په ورځ پر خپلې اېکس پاڼې لیکلي، چې په دې برید کې دوه طالبان وژل شوي او یو ټپي شوی دی. طالبانو تر اوسه په دې اړه څه نه دي ویلي.
دا له یوې اونۍ څخه په کمه موده کې د طالبانو پر پوستو د دغې وسله والې مخالفې ډلې دویم برید دی.
تر دې مخکې د ازادۍ جبهې د لړم په ١١مه اعلان کړى و، چې په بغلان کې يې د طالبانو پر استخباراتي مرکز بريد کړى دى.
دغې جبهې هغه مهال اعلان وکړ، چې په یاد برید کې د طالبانو څلور استخباراتي مامورین وژل شوي دي.
یادې جبهې ویلي وو، چې په وژل شویو کې محب الله چې په حنظله مشهور و هم وژل شوی دی.
افغانستان انټرنشنل - پښتو د یوې بې پرې رسنۍ په توګه نه شي کولی، چې د افغانستان د ازادۍ جبهې یاد خبر تایید یا رد کړي.
د فلسطیني ادارې لومړي وزیر د دوشنبې په ورځ له اروپايي ټولنې او ملګرو ملتونو وغوښتل چې د غزې د تړانګې اوسېدونکو ته د هوا له لارې مرستې ولېږي. محمد اشتیه دا غوښتنه وروسته له هغه وکړه، چې د فلسطین د روغتیا وزارت وویل چې د غزې په شمال کې هېڅ فعال روغتون نه لري.
عربي رسنیو راپور ورکړی، چې د فلسطیني ادارې لومړي وزیر دغه غوښتنه د غزې تړانګې په شمال کې د شخړو زیاتیدو ته په اشارې سره کړې ده.
د دوشنبې په ورځ اسرايیلي ځواکونه د غزې د ښار د مرکزي روغتون دروازې ته ورسېدل؛ چېرې چې د ډاکټرانو په وینا د ماشومانو په ګډون ناروغان د سون توکو د نشتوالي له امله مړه شوي دي.
اسراییل د غزې په تړانګه کې خپل بریدونه وروسته له هغه پیل کړل، چې حماس د تلې په پنځلسمه د اسراییل پر جنوبي سیمو برید وکړ.
له هغه وخت راهیسې په غزه کې د حماس او اسراییل ترمنځ د نښتو له امله په زرګونو کسان وژل شوي او تر نیمايي زیات خلک بې کوره شوي دي.
چارواکو ویلي دي، چې په دغو نښتو کې تر ۱۱۰۰۰ زیات کسان وژل شوي دي، چې ۴۰ سلنه یې ماشومان دي.
د پښتون ژغورنې غورځنګ بنسټګر غړي او د پاکستان د پارلمان پخواني غړي علي وزیر د چمن پرلت غونډې ته په وینا کې وویل، چې د پاکستان حکومت د مذهب په نوم پښتانه تباه کړي دي. نوموړي دا خبرې د تېرو ۲۳ ورځو راهیسې د روان پرلت په غونډه کې کړي دي او له افغان کډوالو سره کېدونکی ظلم یې غندلی.
هغه د ډېورنډ د کرښې دواړو غاړو ته د قومونو لپاره د ډېورنډ پر پوله د پاسپورټ او ویزې د نه منلو تر څنګ ویلي، چې افغانان له خپل وطن څخه په زوره شړل کیږي او د ویزو او پاسپورټونو قید ټاکل ورته د نه منلو خبره ده.
ښاغلي وزیر په چمن کې د مظاهره چیانو په منځ کې په داسې حال کې خبرې کولې، چې د پاکستان حکومت د پاکستان ځینو پښتنو سیاستوالو ته خبرداری ورکړی و، چې د امنیتي دلایلو له مخې دې په دې سیاسي غونډه کې ګډون ونه کړي.
علي وزیر د مظاهره کوونکو په منځ کې د وینا پر مهال د پاکستان حکومت تورن کړ، چې د اسلام او جهاد په نوم سوداګري کوي او د مذهب په نوم افغانستان او پښتانه تباه کوي.
نوموړي د سرحدي ستونزو او د افغان کډوالو په ډله ییز اخراج کې د پاکستان د موقت حکومت سیاستونو ته په اشارې سره خبرداری ورکړ، چې یوه ورځ به راشي چې "پښتانه او افغانان به تاسو ته د دې ظلم سزا درکړي".
د پاکستان د موقت لومړي وزیر انوارالحق کاکړ له ټاکل کېدو وروسته د نوموړي موقت حکومت د افغان کډوالو په تړاو یوه بې سارې پرېکړه وکړه.
د ښاغلي کاکړ په مشرۍ موقتې کابینې د خپل کار په لومړیو میاشتو کې له ۱.۷ میلیونو څخه زیاتو افغان کډوالو ته له پاکستان څخه د وتلو ضرب الاجل ټاکلی و او د ټاکلې مودې په پوره کېدو سره افغان کډوال په زوره وباسي.
د راپورونو له مخې؛ تر دې مهاله له ۲۲۰ زرو څخه زیات افغان کډوال بېرته افغانستان ته ستانه شوي دي او دا لړۍ لا هم روانه ده.
د دې ډلې د صنعت او سوداګرۍ د وزیر نورالدین عزیزي په مشرۍ د طالبانو یو پلاوی په درې اړخیزه غونډه کې د ګډون لپاره اسلام اباد ته رسېدلی دی. په دې پلاوي کې د طالبانو د مالیې، ټرانسپورټ او هوايي چلند ترڅنګ د بهرنیو چارو وزارت استازی شامل دی.
د طالبانو د صنایعو او سوداګرۍ وزارت د دوشنبې په ورځ ( د لړم ۲۲مه ) پر ایکس ټولنیزه شبکه یوه خبرپاڼه خپره کړې او لیکلي یې دي، چې دغه پلاوی د ازبکستان او پاکستان له استازو سره په درې اړخیزه غونډه کې د ګډون په هدف اسلام اباد ته تللی دی.
په اسلام اباد کې د افغانستان سفارت هم یوه ویډیو خپره کړې، چې وايي د طالبانو پلاوی به د دغه سفر پر مهال د دواړو هېوادونو ترمنځ د تګ راتګ او سوداګرۍ په برخه کې د ستونزو پر حل خبرې وکړي.
یو شمېر افغان سوداګرو افغانستان انټرنشنل ـ پښتو سره په خبرو کې وویل؛ اوس یوازې د افغانستان او پاکستان ترمنځ د داخلي تولیداتو سوداګری ادامه لري.
دوی زیاتوي؛ پاکستان په کراچۍ بندر کې د افغان سوداګرو په مالونو بندیز لګولی دی.
یو افغان سوداکر وايي؛ ۲۲۰ قلمه بېلابیل سوداګریز توکي چې پاکستان پرې بندیز لګولی دی او په یو شمېر خوراکي توکو یې لس فیصده مالیه زیاته کړې ده.
د ننګرهار ملي سوداګرو ټولنې رییس او د ننګرهار سوداګرۍ او پانګونې خونې د هیت مدیره غړي زلمي عظیمي افغانستان انټرنشنل ـ پښتو سره په خبرو کې وویل، چې په کراچۍ کې د افغان سوداګرو سلګونه کانټرونه ولاړ دي او پاکستان ورته ګڼې ستونزې جوړې کړي دي.
دی زیاتوي، چې د افغان سوداګرو ستونزو ته د حل په موخه یې د طالبانو ریاست الوزرا اقتصادي مرستیال ملا برادر او سوداګرۍ وزیر سره څو وارې لیدلي دي؛ خو دوی ورته ویلي چې ډېر ژر به د سوداګرۍ وزیر په مشرۍ یو پلاوی د پاکستاني چارواکو سره د خبرو په موخه دغه هېواد ته لاړ شي.
زلمی عظیمي نیوکه کوي، چې پاکستان تل د افغان سوداګرو پر توکو یوطرفه پرېکړې کوي، چې دا د افغانستان او پاکستان تر منځ د ټرانزیټ او سوداګرۍ یا ' اپټا ' تړون خلاف کار دی.
تمه کیږي سبا به د طالبانو د صنعت او سوداګرۍ د وزیر نورالدین عزیزي په مشرۍ پلاوی درې اړخیزه غونډه کې د کډون ترڅنګ په کراچۍ بند کې د افغان سوداګرو د توکو بار کانټرونونو د خوشې کېدو پر ستونزو د حل لپاره هم پاکستاني لوري سره خبرې وکړي.
پاکستان ته د طالبانو د استازو سفر په داسې حال کې کېږي، چې پاکستان په دې وروستیو کې له دغه هېواده د افغان کډوالو په شړلو د طالب چارواکو له نیوکو سره مخ شوی دی.