د اسراییل د بریدونو له امله په غزه کې د لسګونو روغتونونو چارې په ټپه درېدلې دي

AP ۱۴۰۲ لړم ۲۴

په غزه کې د ماشومانو په ګډون زرګونه ولسي خلک یا د اسراییل د بریدونو او یا هم د روغتیایي چارو د ټکني کېدو له امله ژوند له لاسه ورکوي.
په غزه کې له جګړو مخکې شاوخوا دیرش روغتونونه په روغتیايي خدمتونو بوخت و، خو اوسمهال د شلو روغتونونو چارې په بشپړه توګه بندې شوې دي.

په دغو روغتونونو کې چې د سلګونه فلسطیني ناروغانو او ټپیانو درملنه کېدله، سون توکي او نورې روغتیايي اسانتیاوې ختمې شوې دي.
سره له دې چې اسراییلي پوځیانو دغه روغتونونو ته د یوه اندازه توکو د لیږد اجازه ورکړې، خو دوی همداراز وایي چې حماس له روغتونونو او نورو عامه تاسیساتو پوځي ګټه اخلي.
حماس بیا د اسراییل دغه تورونه په کلکه رد کړي دي.
د روغتیا نړیوال سازمان ویلي چې، په غزه کې ۱۳۰ ماشومان مصنوعي ساه اخلي او د مرګ له ګواښ سره مخامخ دي.
له دې سره، د سره صليب نړيوالې کميټې هم ويلي چې په غزه کې د ډيرو فعالو روغتونونو چوپړونه بند شوي دي.
د سره صلیب د کمیټې استازې آلنا سیننکو له یوې رسنۍ سره په مرکه کې د غزې د تړانګې د خلکو د روغتیايي وضعیت په اړه خبرداری ورکړ او ویې ویل چې غزه اوس په یوه کړکیچن حالت کې ده.
د حماس او اسراییل ترمنځ د جګړې له پیل راهیسې په ځلونو له اسراییل د اوربند غوښتنه شوې خو اسراییل وایي تر هغه چې د دوی یرغمل شوي وګړي د حماس له خوا خوشې شوي نه وي اوربند ته غاړه نه ږدي.
اخوا په غزه کې د ولسي وګړو په نښه کېدل هم له نړیوالو غبرګونو سره مخ شوي.
د اسراییل او حماس ترمنځ د جګړو پر دوام د فلسطین یا د اسراییل په ملاتړ د نړۍ په بېلابېلو هېوادونو کې پراخ لاریونونه شوي دي.
د فلسطین په ملاتړ لاریون کونکي وایي چې باید اسراییل اوربند وکړي خو د اسراییل ملاتړ کونکي لاریونوال بیا وایي چې په بشپړه توګه د حماس ډلې تر له منځه تلو باید اسراییل خپلو بریدونو ته دوام ورکړي
د حماس او اسراییل ترمنځ په جګړه کې تر اوسه ۱۲۰۰ اسراییلیان وژل شوي او تر ۲۴۰ ډېر کسان یرغمل شوي دي.
په ورته وخت کې پر غزې د اسراییل په بریدونو کې ۱۱ زره کسان وژل شوي چې ۴۰ سلنه یې ماشومان دي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ