د امریکا پوځ د دغه هېواد هوايي ځواک دوو افسرانو ته د کابل په هوايي ډګر کې د داعش د ځانمرګو بریدونو د ټپیانو په ژغورلو کې د هغوی د رول له امله د برونزو ستوري مډالونه ورکړل.
کارلوس منډوزا او مورګان په ګډو عملیاتو کې ۳۸ ټپیان او د کورنیو ۴۰ غړي یې ژغورلي وو.
د امریکا پوځ د جمعې په ورځ (د لړم ۲۶مه) اعلان وکړ چې دغه جایزې دوی ته د لړم په ۱۸مه د هوايي لیږد رالیږد ټولنې په کلني پروګرام کې ورکړل شوې.
د امریکا د میلیټري ټایمز د خبري آژانس د راپور له مخې، د "برونز ستوري" جایزه د امریکا د پوځ یو له لوړو جایزو څخه ده.
دا جایزه هغو سرتیرو ته ورکول کیږي چې د وسله وال دښمن سره د جګړې پرمهال یې د الوتنې له عملیاتو بهر غوره کارنامې ترسره کړې وي.
له افغانستانه د امریکایي ادارو د سیمه ییزو همکارانو د اېستلو په عملیاتو کې د ۱۴۰۰ لمریز کال د وږي د میاشتې په څلورمه نیټه د داعش په ځانمرګي برید کې د ۱۳ امریکايي پوځیانو په ګډون لسګونه کسان ووژل شول.
دا په نړۍ کې د هوایي عملیاتو تر ټولو لوی عملیات بلل شوي، او په پلي کېدو سره یې د کابل له هوايي ډګر څخه ۱۲۴ زره کسان له افغانستانه اېستل شوي دي چې ډیری یې امریکا ته لیږدول شوي دي