چینايي رسنیو د هرات ولایت له زلزله ځپلو سره د دغه هېواد د ۳۶۰ ټنه بشري مرستو د رسولو خبر ورکړ. په دغو مرستو کې خواړه، خیمې او ژمنۍ جامې شاملې دي. د طالبانو د ماليې وزارت استازي کفایت الله حقاني ویلي، چې دغه مرستې به پر زلزله ځپلو او بې وزلو وویشل شي.
هرات ولایت د تلې په ۱۵مه د یوې خونړۍ زلزلې شاهد و، چې ټکانونو یې څو اونۍ دوام وکړ.
چین تر اوسه هرات ولایت ته د مرستو څو کڅوړې لیږلې دي.
چین د هرات زلزله ځپلو ته خپله لومړنۍ مرسته د تلې ۲۳مه طالبانو ته وسپارله.
د هرات له زلزلې دوه ورځې وروسته چین د هرات له زلزله ځپلو سره د مرستې په موخه طالبانو ته دوه لکه ډالر نغدي مرسته هم ورکړې وه.
په افغانستان کې د ملګرو ملتونو د بشري مرستو د همغږۍ دفتر د پنجشنبې په ورځ اعلان وکړ چې د هرات د زلزلې له قربانیانو سره د مرستې لپاره ۱۷۳ میلیونه ډالرو ته اړتیا ده.
اوچا ویلي چې د هرات زلزله ځپلي خوراکي توکو، روغتيايي خدمتونو، نغدي مرستو او د څښاک اوبو ته اړتيا لري.
