د ملګرو ملتونو د سرمنشي ویاند سټیفانو دوچاریک د لړم په ۲۶مه، په نیویارک کې یوې خبري غونډې ته وویل، د افغانستان له پاره راتلونکې غونډه به د ډسمبر په میاشت کې د قطر په پلازمېنه دوحه کې جوړه شي، خو نوموړي په دې اړه نور جزئیات له خبریالانو سره شریک نه کړل.
د افغانستان له پاره د ملګرو ملتونو تېره غونډه هم د ۲۰۲۳ کال د مئ په میاشت کې په قطر کې جوړه شوې وه، او ملګرو ملتونو ویلي و چې د بلې راتلونکې غونډې له پاره هم تابیا نیسي، خو نېټه یې ورته نه وه څرګنده کړې.
په تېره غونډه کې د یو شمېر هېوادونو ځانګړو استازو برخه لرله، خو طالبان هغې غونډې ته نه و وربلل شوي.
د افغانستان له پاره د امریکا ځانګړي استازي رلمي خلیلزاد د یوې امریکايي رسنۍ سره په تازه مرکه کې ویلي چې په نږدې راتلونکې کې به د افغانستان له پاره ځانګړې ناسته جوړه شي.
تر هغه وړاندې د افغانستان له پاره د روسیې ځانګړي استازی ضمیر کابلوف تېره اونۍ ویلي و چې، ملګري ملتونه به په نږدې راتلونکي کې د افغانستان په اړه د هېوادونو د ځانګړو استازو په حضور کې یوه غونډه جوړه کړي.
