د طالبانو کډوالو چارو وزارت په اېکس پاڼه افغانستان ته د څه باندې اوه زره کډوالو د راستنېدو خبر ورکړی.
د دغه وزارت په خبره، د لړم له ۲۴مې تر ۲۶مې نیټې پورې اوه زره او پنځه سوه او ۶۰ تنه د سپین بولدک او تورخم له لارې هیواد ته راستانه شوي دي.
د کندهار ولایت د سپین بولدک د سرحدي آمریت د معلوماتو له مخې، له دغې لارې د څلور زره او ۲۱۲ تنو او د پاکستان له زندانه د څلورو خوشې شویو کسانو په ګډون ۷۶۶ کورنۍ کیږي په جبري توګه بېرته خپل هېواد ته راستنې کړای شوې دي.
سرچينه زياتوي، يادې کورنۍ د سپين بولدک په سرحدي اداره کې تر نوم لیکلو وروسته د ملګرو ملتونو د کډوالو چارو کمېشنرۍ، د ډنمارک د کډوالو شورا، د خوړو نړيوال سازمان او د کډوالو د نړيوال سازمان دفترونو ته ورپېژندل شوې دي.
د یو بل خبر له مخې، د ننګرهار ولایت د تورخم د سرحدي آمریت د معلوماتو له مخې، د ۲ زره ۷۳۱ کسانو په ګډون ۵۳۴ کورنۍ په جبري توګه هېواد ته راستنې شوې دي.
سره له دې چې له پاکستانه د بې اسناده کډوالو د اېستلو په لومړیو ورځو کې زرګونه افغانان د سپین بولدک او تورخم له لارو په ډیرې چټکۍ سره و اېستل شول، خو په دې وروستیو کې د کډوالو د اېستلو بهیر پڅ شوی دی.