طالب چارواکی: هالنډ، بلجیم، سلواکیا او جرمني ته مې سفرونه کړي او اوس هم په اروپا کې یم
د طالبانو د خوړو او درملو ادارې مشر د شنبې په ورځ «د لړم په ۲۷ مه» په خپل اېکس ټولنیزه شبکه کې لیکلي، چې لا هم په اروپا کې دی. عبدالباري عمر زیاتوي، په تېرو څو ورځو کې یې هالنډ، بلجیم، سلواکیا او جرمني ته په خپل سفر کې له یو شمېر "افغان سفیرانو او دیپلوماتانو" سره هم کتلي دي.
ښاغلي عمر په مشخص ډول د دغو سفیرانو او دیپلوماتانو نومونه نه دي اخیستي، خو لیکلي دي چې د دوی د غونډو او ناستو انځورونه به خپاره شي.
تر دې وړاندې په هالنډ او جرمني کې په یو لړ مراسمو کې د عبدالباري عمر د حضور انځورونه خپاره شول او پراخ غبرګونونه یې وپارول.
تر اوسه په دې اړه کره جزیات نه دي په ډاګه شوي، چې د طالبانو یوه چارواکي ته د اروپايي هېواد د ویزې په ورکولو کې چا اسانتیا برابره کړې وه.
اروپا ته د دغه طالب چارواکي له جنجالي سفر وروسته د جرمني د بهرنیو چارو وزارت او د هالنډ د روغتیا وزیر په جلا جلا توګه ویلي چې دوی به په خپل هېواد کې د عبدالباري عمر د شتون په اړه څېړنې وکړي.
ډیری منتقدین د طالبانو د یوه چارواکي بلنه، چې د نړۍ د بشري حقونو ضد تر ټولو بدنامه ډله ده، د "ترهګرۍ د سپینوالو" د یوې هڅې په توګه تعبیروي.
په تېرو ورځو کې د هالنډ د روغتیا وزیر سره د دغه طالب چارواکي عکس خپور شو چې له پراخو غبرګونونو سره مخ شو.
د هالنډ د ازادۍ د ګوند مشر ګیرټ ویلډرز د طالبانو د یوه چارواکي ترڅنګ د دغه هېواد د روغتیا د وزیر د انځور خپرېدل «د نه باور وړ دسیسه» او «شرمناکه» پېښه بللې ده.
د هالنډ د ولسي جرګې دغه غړي لیکلي، چې ارنسټ کوپرز له طالبانو سره یو انځور اخیستی، چې «یو تروریستي سازمان دی او تر ټولو بد ډوله قاتلان او افراطیان دي.»
د هالنډ د روغتیا وزیر ارنسټ کوپرس ویلي، نه پوهېده چې د ده تر څنګ ولاړ کس د طالبانو استازی دی او د دې عکس په اخیستو پښیمانه دی.
هالنډي چارواکو ویلي چې په دې اړه پلټنه کوي چې د طالبانو استازي څنګه د هاګ په کنفرانس کې ګډون وکړ.
ارنسټ کایپرز نن په یوه یادداشت کې چې هغه په اېکس ټولنیز شبکه کې خپور کړ، لیکلي چې د دې عکس اخیستل یوه تېروتنه وه او په بشپړه توګه باید داسې نه وه شوې.