د افغانستان د پخوانیو نظامیانو کمېټه وايي، که د طالبانو له خوا د دوی د نیولو او وژلو د مخنیوي هڅه ونه شي، ښايي دا پوځیان «د اوکراین په څېر د فلسطین او منځني ختیځ زیاتېدونکې جکړې ته ور ګډ شي.» دا کمېټه په پرانیستي لیک کې له کانګرېس غواړي چې د دوی برخلیک ته کلکه پاملرنه وکړي.
دغه کمېټه په خپل لیک کې له واشنګټن دا هم غواړي چې د طالبانو په شکنجه کې د سلګونو پخوانیو نظامیانو د سملاسي خوشي کولو هڅه هم وکړي.
د پخوانیو نظامیانو کمېټه د شنبې په ورځ په یوه لیک کې چې افغانستان انټرنشنل ته هم رسېدلی، زیاتوي چې شمېر یې له پنځو زرو ډېر دی.
دوی وايي، له امریکا او نړیوالې ټولنې سره د ترهګرۍ ضد جګړې په لومړۍ کرښه کې وجنګېدل خو د جمهوریت تر پرځېدو وروسته تر بل هر پاړکي کم پام ورته شو.
دوی هیله ښيي چې برخلیک ته یې پام وشي او هسې نه د مجبوریت له امله د نړۍ د امنیت او ثبات په دوښمنانو بدل شي.
د دې کمېټې په باور، طالبانو له ټولبښنې سره پخواني نظامیان شکنجه او ووژل، ځکه ډېر پاکستان او ایران ته کډه شول او ممکن د فشار او بې سرنوشتۍ له امله د سیمې د حکومتونو، ترهګرو ډلو او نشه ييي توکو د قاچاق سره یو ځای شي.
دوی د لیک په پاې کې له کانګرس غواړي چې د پخوانیو نظامیانو د نیولو او وژلو د مخنیوي لپاره پر طالبانو فشار واچوي او زیاتوي، «که داسې ونه شي، څنګه چې د اوکریان جګړه کې د دې ځواکونو د حضور شاهد یو، د فلسطین او منځني ختیځ مخ په زیاتېدونکې جګړه کې به یې هم شاهد شو.»
د تېر کال د اکتوبر په وروستیو کې ځینې سرچینو افغانستان انترنشنل ته وویل، چې ایران دغه هېواد ته تللي پخواني افغان نظامیان د روسیې په ملاتړ د اوکراین جګړې ته هڅوي.
د دې سرچینو په خبره، له پخوانیو افغان نظامیانو سره ژمنه شوې چې جګړې ته د تلو په شرط به ښه تنخا او د روسیې وګړتوب ور کړل شي.
د تېر اکتوبر پر ۷ د حماس او اسراییل د جګړې له پیلېدو راهیسې د ایران ملاتړو وسلوالو ډلو په یمن او عراق کې د امریکا پرضد بریدونه کړي او همدارنګه د لبنان حزب الله ډلې هم د اسراییل پوځیان په نښه کړي دي.
په دا مهال ځینې ویدیووې افغانستان انټرنشنل ته رسېدلې چې پکې ایران مېشت افغان کډوال د فلسطین جګړې ته د تللو خبرې کوي.
