د سوېلي وزریستان انګور اډې مشرانو تېره ورځ ناوخته د یوې احتجاجي راټولېدنې پر مهال پرېکړه کړې چې د انګور اډې او برمل تر منځ تګ راتګ په پاسپورټ او ويزه نه مني او د پخوا په څېر به په عادي ډول تګ راتګ کوي.
له تېرو درې ورځو راهیسې پاکستاني پوځ د انګور اډې لاره د تګ راتګ په مخ تړلې.
له تېرې یوې میاشتې راهیسې د سوېلي پښتونخوا په چمن کې لسګونه زره ځايي خلکو د سپین بولدک- چمن په دروازه په پاسپورټ او ویزه د تګ راتګ د جبري کېدو په غبرګون کې پرلت وهلی او غوښتنه يې داده چې په دغه لاره دې د پخوا په څېر عادي تګ راتګ وشي.
تر هغه وړاندې به په دغه لاره تګ راتګ په افغان پيژندپاڼه او پاکستاني شناختي کارډ کېده.
تازه د سوېلي وزیرستان د انګور اډې اوسېدونکو هم وروسته له هغې اعتراضي غونډه کړې چې له تېرو درې ورځو راهیسې پرې پاکستاني پوځ د انګور اډې لاره تړلې ده.
د انګور اډې اسېدونکو ګواښ کړی که په دغه لاره د پاسپورټ او وېزه خبره جبري کیږي دوی به هم ځینې ګامونه واخلي، د انګور اډې يو ځايي مشر حاجي صحبت خان وايي: «زموږ پلرونو او نیکونو دلته قربانۍ ورکړې، دا څه ټوکې نه دي چې هر سړی راشي خپلې خبرې په موږ عملي کړي، موږ د کرښې دواړو غاړو ته ځمکې، کارو باره او خپلوئ لرو، موږ بلکل پاسپورټ او وېزې نه منو.»
په سیمه کې آزاد خبریال لال وزیر وايي چې د انګور اډې د لویې لارې تر بندېدو وروسته په سیمه کې د احتجاجي غونډې مشرانو په پاکستاني امنیتي عسکرو باندې هم وړې د تګ راتګ لارې تړلې دي.
دا مهال د انګور اډې بازار هم په احتجاجي ډول تړل شوی.
د سیمې خلک وايي دا احتجاج به پراخوي او تر هغه به دوام ورکوي چې پاکستان حکومت بېرته خپله پرېکړه نه وي اخیستې.
خو پاکستاني حکومت په دې اړه خپل تازه دريځ نه دی روښانه کړی او یوازې په دې کلک دی چې افغانستان ته په ټولو لارو به تګ راتګ په افغاني او پاکستاني پاسپورټ او وېزو کیږي.