طالبانو د هرات ولایت په رباط سنګي ولسوالۍ کې د زلزله ځپلو لپاره د ۷۳۰ کورونو د جوړولو د چارو پیل خبر ورکړ. د طالبانو د هرات اطلاعاتو او فرهنګ ریاست اعلان وکړ چې د دغه ولایت د رباط سنګي ولسوالۍ په دریو کلیو کې به د زلزله ځپلو کورنیو لپاره ۷۳۰ کورونه جوړیږي.
د طالبانو تر واک لاندې باختر خبري آژانس د خبر له مخې، د دغو کورونو ټوليیز ارزښت له څلورسوه میليونو افغانيو څخه زيات دى .
باختر خبري آژانس د يکشنبې په ورځ (د لړم ۲۸مه) خبر ورکړ چې د هرات ولايت د اطلاعاتو او فرهنګ مشر او د هرات د زلزله ځپلو د کميسیون وياند مولوي احمدالله متقي ویلي چې دغه کورونه به د ٤٥ ورځو په اوږدو کې جوړ شي.
په هرات ولایت کې تېره میاشت د خونړۍ زلزلې له امله څه باندې ۲ زره او ۵۰۰ کسانو ژوند له لاسه ورکړ او تر ۳۰ زره ډېر د استوګنې کورونه یې ویجاړ او یا هم سخت زیانمن کړل.
په افغانستان کې د ملګرو ملتونو د بشري مرستو د همغږۍ دفتر وايي، د هرات د زلزلې له قربانیانو سره د مرستې لپاره د ۲۰۲۴ کال تر مارچ میاشتې پورې ۱۷۳ میلیونه ډالرو ته اړتیا لري.
طالبانو ژمنه کړې چې د زنده جان ولسوالۍ د هغو ۲۰ ویجاړو شویو کلیو لپاره به ۲۱۴۶ د استوګنې کورونه جوړ کړي، چې په زلزله کې تر ټولو زیانمن شوي دي.
تر دې مخکې د طالبانو د ملي دفاع وزارت هم د هرات د زلزله ځپلو کورنیو لپاره د ۳۶ میلیونه او ۵۷۴ زره افغانیو د کورونو د جوړولو خبر ورکړی و.
له زلزلې وروسته د طالبانو د رییس الوزراء اقتصادي مرستیال هم هرات ولایت ته په یوه سفر کې ژمنه وکړه چې دغه ډله به د هرات د زلزله ځپلو لپاره اساسي او بشپړ کورونه جوړوي.
دا لا څرګنده نه ده چې آیا په زلزله ځپلو سیمو کې به د استوګنې د کورونو جوړولو په اړه د طالبانو ژمنې عملي شي او که نه.
