قطر: ډېر ژر به په کندهار کې د ۴۰۰ بستریز روغتون د جوړولو چارې پیل کړو
د روسیې سپونټیک خبري اژانس د طالبانو له قوله لیکلي، چې قطر ورسره د کندهار په ښار کې د ۴۰۰ بستریز روغتون د جوړولو ژمنه کړې. دغه اژانس د طالبانو د روغتیا وزارت د ویاند له قوله لیکلي، چې د روغتون د جوړولو چارې به ډېر ژر پیل شي؛ خو په دې برخه کې یې زیات جزییات نه دي ورکړي.
قطر طالبانو ته د نړۍ له ټولو هېوادونو نږدې هېواد دی، له هغوی سره ښې اړیکې پالي له یوې لسیزې راهیسې یې دغې ډلې ته سیاسي دفتر ورکړی او د امریکا سره یې د دغې ډلې د تړون کوربهتوب او منځګړیتوب هم په غاړه لاره.
یو شمېر کندهاریان وايي، که دغه روغتون په هغه ولایت کې جوړ شي، نه یوازې به د کندهاریانو لپاره ګټور وي؛ بلکې د سوېل لویدیځې حوزې د ګڼو ولایتونو لپاره به هم زیاتې اسانتیاوې برابرې شي.
