د هرات د امنیتي کنفرانس په دویمه ورځ د افغانستان د پخواني جمهوري دولت د کار او ټولنیزو چارو وزیر بشیر احمد ته ینج د افغانستان په شمال کې د پاکستاني طالبانو او کډوالو د خوځښت او ځای پر ځای کېدو په اړه اندېښنه څرګنده کړه.
نوموړي وويل، چې په شمالي ولايتونو کې د ټي ټي پي په راتګ سره به طالبان دغه سيمه په يوې بلې غزې بدله کړي.
د افغانستان د کار او ټولنيزو چارو پخواني وزير د لیندۍ په ٧مه په دې کنفرانس کې زياته کړه، چې دغه لېږد د ټولو افغانانو لپاره خطرناک دى.
بشیر احمد ته ینج د افغانستان له خلکو وغوښتل چې په شمال کې د پاکستاني طالبانو د ځای پر ځای کېدو پر ضد اعتراض وکړي.
د افغانستان د ستراتیژیکو مطالعاتو د مرکز له خوا د هرات امنیتي غونډه د تاجکستان په پلازمېنه دوشنبه کې د دوو ورځو لپاره جوړه شوې ده.
پخواني جهادي مشر اسماعیل خان هم په دې غونډه کې وویل، چې طالبان هڅه کوي د افغانستان په شمال کې د پاکستاني مهاجرینو په مېشته کولو سره د نفوسو په جوړښت کې بدلون راولي او د هېواد په شمال کې ناامنۍ ته پراختیا ورکړي.
