په تاجکستان کې د هرات د امنیتي ناستې په وروستۍ ورځ د افغانستان د پخواني حکومت د ملي دفاع وزارت پخواني سرپرست او د جمهوري غوښتونکو خوځښت مشر شاه محمود میاخیل وویل، چې طالبان پر خبرو اترو باور نه لري او کومه تګ لاره چې دوی غوره کړې، په افغانستان کې بلې جګړې ته لار پرانیزي.

هغه زیاته کړه: « طالبانو په افغانستان کې استبدادي ملایي نظام رامنځته کړی چې ساری یې د نړۍ په هېڅ اسلامي هېواد کې نه لیدل کیږي».

هغه وویل، چې افغانانو د تېرو نظامونو له سقوط څخه هېڅ عبرت نه دی اخیستی.

نوموړی زیاتوي، چې په تېرو دوه نیمو کلونو کې افغان سیاستوال په دې نه دي توانېدلي، چې یو واحد موقف جوړ کړي، چې هم یې د افغانستان خلک ومني او هم نړۍواله ټولنه.

هغه دې ته په اشارې سره چې د سیمو هېوادونو هم د افغانستان د نظامونو له سقوط څخه عبرت نه دی اخیستی زیاته کړه، چې ټول په تعامل کې خوښ دي.

هغه وویل: «تعامل د سیاسي پلوه یوه بې معنا، ناچاره او بې نتیجې پروسه ده. هغه وخت موږ افغانستان لپاره کار کولی شو، چې هلته یو مشروع او قانونمنده نظام شتون ولري؛ که داسې نه وي افغانستان د سیمې او سیمه د افغانستان لپاره خطر ده».

هغه زیاته کړه، چې له پخوانیو روایتونو، پالیسیو او فکرونو چې د نظام د سقوط لامل شو؛ "نه شو کولې پر افغانستان حاکمیت ولرو".

نوموړي په سیمه او نړۍ کې له طالبانو سره د تعامل پر سیاست نیوکه وکړه او زیاته یې کړه، چې دغه سیاست په افغانستان او سیمه کې افراطیت زیاتوي: "د سیمې او نړۍ تر منځ د تعامل پالیسي به په سیمه کې افراطیت ته وده ورکړي" ځکه چې طالبان په سیمه کې له ټولو افراطي ډلو سره د مبارزې اراده او وړتیا نه لري . نه د ختیځ ترکستان اسلامي تحریک مخi نیولی شي، نه د تحریر ګوند، نه هم د داعش او نه هم د القاعده ».

نوموړي د غونډې د یوې ګډنوالې د پوښتنې په ځواب کې وویل، چې په افغانستان کې ټولو اقشارو سربېره پر دې چې له جمهوري دولت په جوړښت کې په یو نه یو ډول دخیل وو، د هماغه نظام پښې وهلې او د نظام په تخریب کې یې رول لوبولی دی.

شاه محمود میاخېل په یادې غوڼډې کې د ملي سرود او پښتو ژبې ژباړن پر نشتون هم نیوکه وکړه او هیله یې څرګنده کړه، چې په راتلونکو ورته مجلسونو کې ملي سرود وغږول شي او د غونډې د ګډونوالو لپاره د پښتو ژبې ژباړن هم موجود وي.