پاکستانۍ رسنیو راپور ورکړی، چې د پاکستان د بهرنیو چارو وزارت د سه شنبې په ورځ په پاکستان کې د افغانستان د سفارت مشر احضار کړ او هغه ته یې د حافظ ګل بهادر د سپارلو غوښتنه وکړه، چې د خیبر پښتونخوا په بنو کې یې د وروستي ځانمرګي برید پړه منلې وه.
په پاکستان کې د افغانستان د سفارت استازی په بنو کې د (نومبر په ۲۶مې) د ځانمرګي برید په غبرګون چې دوه ولسي وګړي په کې ووژل شول او د درېیو سرتېرو په ګډون ۱۰ تنه نور ټپیان شول، د اعتراض په توګه د بهرنیو چارو وزارت ته ورغوښتل شوی و.
د پاکستان د دولت د پلټنو له مخې، د بنو ځانمرګی بریدګر افغان و.
د پاکستاني چارواکو په وینا، دا په پاکستان کې د یوه افغان لهخوا ۱۶م ځانمرګی برید و.
د اېکسپرېس ټربیون د راپور له مخې، پاکستان د طالبانو ډیپلوماټ ته په دغه هېواد کې د بریدونو د ترسره کولو لپاره د افغان خاورې د پرله پسې کارولو په اړه خپله جدي اندېښنه څرګنده کړې.
د ټربیون په وینا، افغان استازي ته څلور مهمې غوښتنې وړاندې شوې دي:
په دغو غوښتنو کې د بنو د بريد په اړه بشپړې پلټنې او د عاملينو پر ضد د ګام اخیستنه هم شامله ده.
همدارنګه د افغان طالبانو استازي ته ویل شوي وو، حافظ ګل بهادر چې یو وخت یې د ټيټيپي د یوې څانګې مشري کوله ونیسي او پاکستان ته یې وسپاري.
اسلام اباد هم پر خپله غوښتنه یو ځل بیا ټینګار کړی، چې «د کابل رژیم باید په پاکستان کې د ترهګرو بریدونو لپاره د افغانستان له خاورې د استفادې مخنیوی وکړي.»
خو طالبانو تل ویلي، چاته اچازه نه ورکوي چې د افغانستان خاوره د کوم هېواد پر ضد وکاروي.