د فرانسې ولسمشر ایمانویل مکرون د شنبې په ورځ ویلي چې فرانسه په غزه کې د تاوتریخوالي د بیا پیلیدو له امله "ډیره اندیښمنه ده" او هغه قطر ته ځي چې د اوربند د ټینګولو په هڅو کې مرسته وکړي.
مکرون په دوبۍ کې د اقلیمي بدلون په اړه د ملګرو ملتونو د سرمشریزې په څڼډه کې یوې خبري غونډې ته وویل چې د دوامداره اوربند او د ټولو یرغملو د خوشي کولو لپاره روانې هڅې باید دوه برابره شي.
د جمعې په ورځ د اسراییل او حماس ترمنځ لنډمهاله اوربند وروسته له هغه مات شو چې منځګړي هیوادونه د دغه اوربند په غځولو کې پاتې راغلل.
اسراییل او حماس د اوربند د ماتولو پړه پر یو بل اچوي.
مکرون همدا راز له اسراییل وغوښتل چې د حماس پر وړاندې خپلې موخې روښانه کړي.
هغه وويل: "موږ په داسې یو وخت کې يو چې نور اسرایيلي چارواکي بايد په دقيقه توګه خپلې موخې او وروستۍ موخه بیان کړي: په بشپړه توګه د حماس له منځه وړل، ايا څوک فکر کوي چې دا امکان لري؟ که داسې وي، نو جګړه به لس کاله دوام وکړي."
مکرون زیاته کړه: "که د اسراییل امنیت د فلسطینیانو د ژوند په بیه او په سیمه کې د عامه افکارو د قهرجنولو په پایله کې خوندي کیږي، په سیمه کې به د اسراییل لپاره هیڅکله ډاډه امنیت خوندي نشي."
