د چمن پولیسو د پښتون ژغورنې غورځنګ پر مشر منظور احمد پښتین عریضه کړې او تر نیول کېدو وروسته یې خیبر پښتونخوا ته لېږدولی دی. خو د پښتون ژغورنې غورځنګ غړي وايي، د منظور احمد پښتین په اړه معلومات نه لري او د پولیسو له لوري نامعلوم ځای ته لېږدول شوی دی.
منظور احمد پښتین تېره ورځ د چمن په پرلت کې تر وینا وروستهح، د بلوچستان ایالت تربت سیمې ته د تلو پر مهال د پولیسو له لورې ونیول شو.
د منظور پښتین پر موټریز کاروان لومړی د پولیسو له لورې ډزې وشوې او وروسته یې نوموړی ونیو او له ځان سره یې یووړ.
د بلوچستان ایالتي چارواکي د منظور احمد پښتین نیول مني او وايي، نوموړی یې تېره ورځ د خیبر پښتونخوا ایالت دېره اسماعیل خان پولیسو ته سپارلی دی.
د بلوچستان پولیسو د منظور پښتین د یوه ساتونکي له لوري پر پولیسو د ډزو په تور عریضه ثبت کړې ده.
د پولیسو له لورې د منظور پښتین له نیول کېدو سره سم، دغه غورځنګ په پاکستان کې د لاریونونو د ترسره کولو خبر ورکړی دی او لومړی لاریون یې د سه شنبې په ورځ د چمن ښار له هغه ځایه پیل کړ، چیرې چې تېره ورځ د پولیسو له لورې پر منظور پښتین ډزې وشوې او نوموړی یې ونیوو.
بل خوا د پښتون ژغورنې غورځنګ د مشر منظور احمد پښتین ملګرو پر خواله رسنیو یوه ویډیو خپره کړې او په دغه ویډیو کې ادعا کوي، چې منظور احمد پښتین د پولیسو له لورې نامعلوم ځای ته وړل شوی دی.
د پښتون ژغورنې غورځنګ غړی طاهر مسید وايي:« تېره شپه د دېره اسماعیل خان د درازنده په سیمه کې د پولیسو د مرکز مخې ته موږ تر سهاره انتظار کاوه، سهار وختي پولیسو نوموړی د دغه مرکز څخه د ډي ای خان په لورې روان کړ. موږ هغوی وڅارل منظور پښتین یې تر صدر تاڼې ورساوه، هلته یې پښتین ته ویلي و، چې نوموړی محکمي ته سپاري او د وکیل غوښتنه یې کړې وه؛ خو هغه وخت پولیسو منظور پښتین په بل موټر کې ولېږداوه او زموږ اړیکه له منظور پښتین سره پرې شوه. اوس موږ نه پوهېږو، چې نوموړی یې چیرې وړی دی.»
د پښتون ژغورنې غورځنګ مشر منظور احمد پښتین تېره ورځ د چمن له پرلت څخه د تربت په لوري روان و، چې د نوموړي پر موټریز کاروان د پولیسو له لورې ډزې وشوې او د ښاغلي پښتین پر موټر د پولیسو له اتو څخه تر نهو مرمۍ لګېدلي دي.
په دغه پېښه کې منظور پښتین ته کوم زیان نه دی رسېدلی؛ خو یوه لاروۍ ښځه په دغه ډزو کې ټپې شوې ده.
