ایراني رسنۍ: افغانانو په مشهد کې تر یو میلیارد ډالرو زیاته پانګونه کړې ده

AP ۱۴۰۲ لیندۍ ۱۸

ایراني رسنیو ویلي، چې د خراسان رضوي په بازار کې څه باندې ۱۶ زره افغانان د یو میلیارد ډالرو په ارزښت په سوداګریزو کارونو بوخت دي.

په خراسان رضوي کې د افغان اقتصادي فعالانو د ټولنې مشر وايي، افغانان په مشهد کې د بهرنۍ پانګونې په لومړي ځای کې دي.

د صدا او سیما په نوم دولتي خبري اژانس د شنبې په ورځ د بشير احمد اربابي له قوله ليلکي، چې په خراسان رضوي کې له ۴۵ څخه تر ۵۰ سلنه بهرنۍ پانګونه افغان سوداګرو کړې ده.

د نوموړي د معلوماتو له مخي، ډېر لوی او تجربه کار سوداګر، چې ډېرې شتمنۍ یې درلودې، ایران په ځانګړې توګه مشهد ښار ته کډوال شوي دي.

ښاغلي اربابي وويل، ايران د افغان پانګوالو لپاره لومړی ځای لري.

د ایران د بهرنیو پانګوالو د ټولنې مشر حسین سلیمي تر دې مخکې ویلي و، چې په دغه هېواد کې د بهرنیو پانګونو ډېری غوښتونکي افغانان دي.

د ۲۰۲۱ کال په اګسټ کې د طالبانو له واک ته رسېدو وروسته، د افغان سوداګرو او پانګوالو په ګډون له بېلا- بېلو برخو څخه ګڼ شمېر افغانان ایران ته کډوال شول.

خو په دې وروستیو میاشتو کې په ایران کې د هغو افغان کډوالو، چې د اوسېدو اسنادونه یې نه درلوده د جبري ایستلو لړۍ زياته شوې او اسلامي جمهوریت د هېواد په ۱۶ ولایتونو کې د افغانانو پر شتون بندیز لګولی دی.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ