د افغانستان د ښځو اعتراضي خوځښتونو ملګرو ملتونو ته په یوه پرانیستي لیک کې د افغانستان په اړه په نړۍوالو غونډو کې د ښځو د استازو پر ګډون ټینګار کړی. په لیک کې راغلي، چې د دوحې ناسته کې د طالبانو د باصلاحیته مخالفینو له ګډون پرته به د دې غونډې پایلې "د منلو وړ" نه وي.
د افغان ښځو اعتراضي خوځښتونه چې د ښځو د حقونو د دفاع له څو بنسټونو څخه جوړ دی؛ د چهارشنبې ورځ د ( د سلواغې ۱۱مه ) په دغه لیک کې لیکلي، چې د طالبانو د مخالفینو د استازو له حضور پرته د دوحې غونډه به بشري او د ښځو د حقونو وضعیت لا پسې خراب کړي.
د ښځو اعتراضي خوځښتونو له ملګرو ملتونو غوښتي، چې د افغانستان د مسالې او په ځانګړې توګه د ښځو د حقونو د خوندیتوب په برخه کې "مسوولانه چلند" وکړي او د دغه هېواد له ښځو سره خپل باور وساتي.
د دې مکتوب په یوه برخه کې د طالبانو د فرامینو پر بنسټ د ښځو د فزيکي حذف یادونه شوې او ویل شوي: « د شکنجې، جنسي تېري او بې عزتۍ د زیاتوالي، بد چلند، عدلي او قضايي ارګانونو ته د نه لاس رسي له امله د ښځو مرموز قتلونه او ځان وژنې زیاتې شوي، چې د دوی اندېښنې یې راپارولې دي.»
په دغه لیک کې اعتراض کوونکو ښځو افغانستان کې د بشري حقونو وضعیت کړکېچن بللی دی.
د دوحې غونډه د هغو هېوادونو د استازو په حضور کې چې د افغانستان په اړه ځانګړي استازي لري، ټاکل شوې د ملګرو ملتونو له خوا د روانې میلادي میاشتې په ۱۸مه او ۱۹مه نېټه جوړه شي.
طالب چارواکو تېره اونۍ وویل، چې د دوحې غونډې ته د دې ډلې یو استازی هم بلل شوی دی. بل خوا د افغانستان د ژغورنې لپاره د مقاومت شورا ویلي، چې د دې غونډې په اړه د طالبانو له سیاسي مخالفینو سره سلا نه ده شوې.
