د اروپايي شورا مشر خبر ورکړ چې اروپايي ټولنې له ۲۰۲۴ څخه تر ۲۰۲۷ کال پورې اوکراين ته د ۵۰ ملياردو يورو د نویو مرستو لپاره موافقت کړی. شارل میشل ویلي: «اروپايي ټولنه د اوکراین د ملاتړ مشري او مسوولیت په غاړه اخلي. موږ پوهیږو چې څه له ګواښ سره مخ دي.»
نوموړي په خپل اېکس کې لیکلي، چې نوې بودیجه به د اوکراین د باثباته او اوږدمهاله مالي تمویل لامل شي.
په ورته وخت کې ډیلي میل راپور ورکړی چې پر اوکراین د روسیې له یرغل دوه کاله وروسته، د کییف اقتصاد ملاتړ ته جدي اړتیا لري.
د اوکراین ولسمشر ولادیمیر زیلینسکي د اروپايي ټولنې د ۵۰ میلیارده یورو د مرستې د پرېکړې هرکلی کړی دی.
نوموړي هم خپل اېکس کې لیکلي: «دا ډیره مهمه ده چې دا پریکړه د ټولو ۲۷ [اروپایي اتحادیې] د مشرانو لخوا شوې ده چې یو ځل بیا د اروپایي اتحادیې قوي یووالی ثابتوي.»
د ښاغلي زیلینسکي په خبره، له اوکراین څخه د اروپايي ټولنې د مالي ملاتړ دوام به اوږدمهاله اقتصادي او مالي ثبات پیاوړی کړي، چې ارزښت یې له پوځي مرستو او پر روسیې د بندیزونو له فشار څخه کم نه دی.
د تېر کال وروستیو کې د اروپايي ټولنې یوه غړي هنګري اوکراین ته د مرستو ور کولو او په دغه ټولنه کې د کیف له غړیتوب سره مخالفت کړی و.
