په داسې حال کې چې د ښځو د حقونو ملاتړي بنسټونه د طالبانو د امر بالمعروف وزارت د ښځو د حقونو تر ټولو ستره نقضوونکې اداره بلي، د یاد وزرات وزیر دغه وزارت د ښځو له حقونو د دفاع خبره کوي.
محمد خالد حنفي د پنجشنبې په ورځ (د سلواغې ۱۲مه) په پکتیا ولایت کې یوې غونډې ته د وینا پرمهال وویل، چې د امر بالمعروف او نهې عن المنکر وزارت د ښځو د حقونو د دفاع ضامن دی.
نوموړی وایي: "که زموږ اداره د نړۍوالو د بندیزونو تر اثر لاندې راتلی نو په افغانستان کې به اسلامي نظام تطبیق شوی نه و."
د طالبانو د امر بالمعروف وزیر همدا راز زیاته کړه، چې د بشري حقونو سم تعریف نه دی شوی او نړۍ د بشري حقونو په نوم اسلامي احکام نقضوي.
سر ه له دې چې پر افغانستان د طالبانو له واکمنېدو وروسته د امربالمعروف وزارت پر افغان ښځو د بندیزونو څه باندې پنځوس فرمانونه صادر کړي؛ خو ښاغلی حنفي وایي د هرې افغانې ښځې حق چې تر پښو لاندې کیږي کولی شي د دغه وزارت ریاستونو ته مراجعه وکړي.
نوموړي که څه هم د کومې مشخصې ادارې نوم نه دی اخیستی خو وایي یو شمیر ادارې ښځو ته ډالر ورکوي ترڅو په افغانستان کې بې حجابي عام کړي.
په وروستۍ یوه میاشت کې د بې حجابۍ په پلمه یاد وزارت لسګونه ښځې د هیواد له بیلابیلو سیمو نیولي دي او نامعلومو ځایونو کې ساتل کیږي.