د ملګرو ملتونو د همغږۍ ادارې یا اوچا په اېکس پاڼه لیکلي، چې د دغه شمېر ۸۴سلنه افغان کډوال د ۲۰۲۳ کال په درېیو وروستیو میاشتو کې بېرته خپل هېواد ته ستانه شوي دي. د دغې ادارې په وینا، دغه شمېر د روان کال په جنورۍ میاشت کې تر ۵۰۰ زرو لوړ شوی دی.
د دغې ادارې د شمېرو له مخې، په دغو کډوالو کې ۳۲۴.۷ زره کسان د تورخم له لارې، ۱۷۲.۶ زره کسان د سپین بولدک له لارې، ۱.۵ زره کسان د بادیني له لارې او ۹.۳ زره کسان د غلام خان بندر له لارې افغانستان ته ستانه شوي دي.
د دغې ادارې د مالوماتو پر بنسټ، په دغو راستنو شویو کډوالو کې ۴۸ سلنه یې ښځې او ۵۲ سلنه یې نارینه دي.
د اوچا په وینا، په راستنو شویو کسانو کې ۶۲ سلنه یې ماشومان دي.
اوچا وایي، چې د دغه کډوالو د اړتیاوو پوره کولو لپاره بېړنۍ بودجې ته اړتیا لري.
تېره ورځ هم د خوړو نړۍوال پروګرام له پاکستانه د جبري راستنو شویو افغان کډوالو د وضعیت په اړه سخته اندېښنه ښودلې وه.
خو تر دې وړاندې پاکستانۍ رسنیو د اړوندو ادارو د مالوماتو پر بنسټ راپور ورکړی و، چې د ۲۰۲۴ کال د جنورۍ تر ۲۹مې له پاکستانه د ستنو شویو بې اسناده افغانانو شمېر ۴۷۸۳۰۰ ته لوړ شوی و.
