د کېنیا چارواکو اعلان کړی، چې د ګازو په یوه شرکت کې د چاودنې له امله دوه کسه وژل شوي او تر ۲۲۲ ډېر بیا ټپیان دي. د کېنیا د حکومت ویاند وایي، دغه چاودنه تېره شپه په نایروبي ښار کې شوې چې د دغه شرکت ودانۍ یې سخته ویجاړه کړې ده.
د اسحاق مواورا په وینا، د دغې چاودنې له امله د لګېدلي اور لمبې نورو سوداګریزو سیمو او استوګنځایونه ته هم رسېدلې دي.د کېنیا سره صلیب ویلي، چې ژغورونکې ډلې ۲۷۱ کسان روغتونونو ته لېږدولي دي.
د پنجاب د روغتیا وزارت په وینا په تېرو ۲۴ ساعتونو کې په دغې صوبه کې د سیخ و برېښ ناروغۍ ۷۹۲ نوې پېښې راپور شوې، چې یوازې په لاهور کې ۱۹۱ ماشومانو کې د سیخ و برېښ ناروغۍ پخلی شوی.
دغه وزارت وایي، چې په پنجاب کې روان کال د سيخ و برېښ ۱۸ زره ۸۰۴ پېښې راپور شوې دي چې پکې ۳۰۳ کسان مړه شوي دي او لاهم دغه ناروغي د خپرېدو په حال کې ده.
د جنورۍ په میاشت کې په پنجاب کې په سیخ و برېښ د اخته ماشومانو شمېر ۱۸ زره ۴۰ ته ورسېد، په داسې حال کې چې په دغې صوبه کې ۲۹۶ ماشومان ترې تر دې مهاله مړه شوي دي.
د پنجاب د واکسيناسيون د برخې مشر ډاکټر مختار وايي، په دې ورځو کې په پنجاب صوبه کې د سیخ و برېښ ناروغي په چټکۍ سره د خپرېدو په حال کې ده.
د تېرو ۲۴ ساعتونو د مړو شویو ۳ پېښې په بهاولپور، ۲ په فیصل اباد، یوه په لاهور او یوه په ملتان کې ثبتې شوې دي.
د ټیسلا د موټر جوړولو شرکت خاوند ایلن ماسک په دې اونۍ کې د امریکا په تاریخ کې یو له تر ټولو لوی حقوقي زیان سره مخامخ شو. هغه د ټیسلا د یو سهمدار ریچارډ تورینټا پر وړاندې په یوه حقوقي قضیه کې د ۵۶ میلیارد ډالرو زیان وکړ.
د ایلن ماسک خالصه پانګه شاخوه ۲۰۰ میلیارده ډالر ده.
ریچارډ تورینټا په ۲۰۱۸ کال کې، کله چې نوموړي د ټیسلا کمپنۍ ۹ فیصده شریک و، له ایلان مساک څخه شکایت وکړ.
نوموړي په ۲۰۱۸ کال کې د ټیسلا کمپنۍ له خوا ایلان ماسک ته ۵۶ میلیارده ډالر د ورکړې په اړه له هغه قاضي ته شکایت کړی و.
د دغه شکایت قضیه په ۲۰۲۲ کال کې محکمې ته ولاړه او د سه شنبې په ورځ یو قاضيله ریچارډ تورناټا ملاتړ وکړ او د ټیسلا د کمپنۍ له خوا ایلن ماسک ته ۵۶ میلیارده ډالرو ورکړه یې ناعادلانه وبلله.
د ۵۶ میلیارد ډالرو د ورکړې دغه تړون تر دې وړاندې د امریکا په دلاور ایالت د یوې بلې محکمې له خوا هم رد شوی وو.
ایلن ماسک د ټيسلا کمپنۍ خاوند دی، خو د دغې کمپنۍ اسهام په ازاد بازار کې پلورل کیږي او د دغې کمپنۍ یوازې ۱۳ سلنه اسهام د ښاغلي ماسک ملکیت دی.
ویل کیږي چې ښاغلي ماسک د دغو ۵۶ میلیارد ډالرو تر لاسه کولو وروسته په د نړۍ تر ټولو بډایه کس پیژندل شوی و.
بزګرو د پنجشنبې په ورځ په بروکسل کې د اروپا پارلمان په هګیو او ډبرو ویشتلی دی، ودانۍ ته نږدې یې اورونه بل کړي؛ د اروپايي ټولنې له مشرانو غواړي د مالیاتو او مخ په زیاتېدونکو لګښتونو کې له دوی سره مرسته وکړي.
د رویټرز خبري اژانس د رپوټ له مخې؛ د اروپايي ټولنې غړو هېوادونو ګرونګر د پاکې انرژې د تولید په اړه د وضع شویو مقرراتو او ارزانه وارداتو له امله په قهر دي.
د پنجشنبې ورځې په لاریون کې د ایټالیا، هسپانیې او نورو اروپایي هېوادونو کرندګرو ګډون کړی و، چې د اروپايي ټولنې د یوې بلې غوڼډې پر مهال ترسره شو.
د کروندګرو ترمنځ مخ په زیاتېدونکې قهر په پرتګال، یونان او المان کې هم لیدل کیږي، چې د اقلیم د بدلون سره د مبارزې لپاره د اروپايي ټولنې د نوو مقرراتو سره تړلي دي.
د هسپانوي بزګرانو د اتحادیې مشر جوس ماریا کاستیلا وايي: "موږ غواړو د دې بې معنا قوانینو مخه ونیسو چې هره ورځ د اروپایي کمېسیون له خوا پر مونږ تپل کیږي."
د اروپايي ټولنې مشران هڅه کوي، چې د کرونګرو ترمنځ راپارېدلې غوسه کمه کړي.
د فرانسې لومړي وزیر ګابریل اتل د بزګرو د ژوند د اسانه کولو او ښه کولو په برخه کې ژمنه کړې او ویلي یې دي، چې چې د اورپا په کچه د دوی د حقونو ساتنه به کوي.
نوموړي دغه راز ویلي، چې د هغه ارزانه محصولاتو پر واردولو به بندیز ولګوي، چې په ترکیب کې یې په اروپا کې منع شوي مواد کارول شوي وي او ټول وارداتي محصولات به ځانګړې نښې ولري.
د بزګرو ځینې غوښتنې لکه له اوکراین څخه د فارمي محصولاتو د واردات محدودول او د اقلیمي بدلون د مخنیوي په موخه وضع شوي قوانینو اسانول لا وړاندې منل شوي دي.
خو کرندور وايي، چې پورته شوي ګامونه کافي نه دي او دا دوی د لوړو مالیاتو او د اقلیمي بدلون سره د مبارزې لپاره له سختو او له بهره د کېدونکو وارداتو له امله له نا عادلانه سیالۍ سره مخامخ دي.
څو امریکايي چارواکو نن سي بي اېس نیوز ته نن ویلي" واشنګټن په عراق او سوریه کې د ایراني پرسونل او تاسیساتو په ګډون پر مختلفو اهدافو د څو ورځو د بریدونو پلان منظور کړی دی. دا ګام په اردن کې د امریکا پر اډه له برید وروسته دی، چې درې امریکايي سرتېري پکې ووژل او نږدې دېرش ټپیان شول.
امریکايي چارواکي وايي؛ د تېرې شنبې دا برید په عراق کې ایران ملاتړې کتایب حزب الله ډلې کړی او پکې یې ایران جوړې ډرون کارولي دي.
په غزه کې له تېر اکتوبر راهیسې د اسراییل او حماس د جګړې پیلېدو سره دا د امریکايي ځواکونو لومړنۍ مرګ ژوبله وه.
له دې پېښې وروسته د امریکا ولسمشر جو بایډن د غچ اخیستو لپاره له فشار سره مخ دی او هغه هم ویلي، چې د ځواب پرېکړه یې کړې؛ خو په دې هکله یې خپل پلان ښکاره کړی نه دی.
خو تازه امریکايي چاروکو سي بي اېس ته ویلي، چې د دې پلان شویو بریدونو په کولو کې هوا مهم عامل دی او دوی هڅه کوي، چې د ولسي وګړو د مرګ ژوبلې د مخنیوي لپاره په رڼه هوا کې بریدونه وکړي.
پر اسراییل د حماس د تېر اکتوبر د ۷ له برید او د تل ابیب په ځوابي یرغل پسې منځني ختیځ کې ایران ملاتړو ډلو هم د اسراییل او امریکا پر اهدافو وخت ناوخت بریدونه کړي دي.
په مقابل کې امریکا او اسراییل هم په عراق او سوریه کې د ایران ملاتړو وسلوالو پر مرکزونو بریدونه کړي او یوه برید کې د ایران د سپاه پاسداران څلور قوماندانان هم ووژل شول.
باوري سرچینو روټیرز ته نن ویلي، چې په سوریه کې له دې پېښې وروسته ایران د سپاه پاسدارن ځینې مهم قوماندانان اېستلي دي.
د پاکستان ځانګړې محکمه وايي؛ د دغه هېواد پخواني لومړي وزیر عمران خان د دولتي راز په افشا کولو سره د امریکا او اسلام اباد اړيکي خراب او د خپل هېواد اقتصاد، سیاست او ډېپلوماسۍ ته یې زیان ورساوه.
عمران خان دوه ورځې مخکې د دې راز د بربنډولو له امله مجرم وپېژندل او په لس کاله بند محکوم شو.
د دې دوسیې په برخه کې ځانګړې محکمې د پنجشنبې په ورځ خپله پرېکړه په ۷۷ مخیز راپور کې خپره کړه.
په راپور کې ویل شوي: «ښکاره خبره ده چې عمران خان د دولتي راز بربنډولو سره په اقتصاد، سیاست او ډېپلوماستۍ کې سخت تاوان ورساوه. ور سره د پاکستان اقتصاد کمزوری شو او په نتیجه کې یې ملي امنیت سخت اغېزمن شو.»
د دې راپور له مخې؛ د عمران خان دغه دولتي راز پر ښکاره کولو سربېره، لاس پکې وهلی او هم یې ناسم او د ځان په ګټه کارولی، ځکه یې د قانون له مخې په دې برخه کې څلور جرمه کړي دي.
عمران خان دا راز د دې ثبوت بولي چې پر اوکراین د روسیې له برید وروسته مسکو ته د نوموړي په سفر پسې امریکا او د پاکستان پوځي جنرالانو د دسیسې جوړولو سره پر ۲۰۲۲ کال کې د نوموړي حکومت وپرځاوه.
د عمران خان وکیل انتظار پنجوته د محکمې نوې پرېکړې ناسمه بولي او وايي؛ ستره محکمه کې به پاېښت ونه مومي.
پخوانی لومړی وزیر نواز شریف او لور یې مریم نواز هم د ورته تورونو له امله د ۲۰۱۸ کال تر ټاکنو مخکې بندي شول او شنونکي وايي، چې د دوی بند د عمران خان له بري سره مرسته وکړه.
د دوی په باور اوس د عمران خان بندي کېدل له نواز شریف سره په راتلونکو ټاکنو کې د بري چانس ډېروي.
دغو دواړو مشرانو د پاکستان پوځ د دوی پر ضد پر دوسیو جوړولو تورنوي؛ خو پوځ دا تورونه ردوي.