د بریتانیا د لندن پولیسو د عبدالشکور ایزدي په نوم د یوه افغان د انځوونو خپرولو سره نوموړی پر یوه ښځه او د هغې پر دوو لوڼو د کیمیايي برید مسوول وباله.
ګارډین ورځپاڼې ته چارواکو ویلي چې دا افغان پر ۲۰۱۶ کال بې اسنادو بریتانیا ته تللی دی.
د لندن پولیسو د دې کس انځورونه هم خپاره کړي چې د مخ ښۍ خوا یې ټپي ښکاري. پولیسو دا تورن «خطرناک» بللی او ویلي یې دي: «که مو ولید ور نږدې نه شئ.»
د راپورنو له مخې، دغه کس تېر چارشنبه پر ۳۱ کلنه ښځه او د هغې پر درې او اته کلنو لوڼو برید وکړ.
دې برید کې هغه څلور کسان او پنځه پولیس هم کیمیايي موادو سره ټپي شوي چې دا مېرمن او نجونې یې ترې خلاصولې.
عبدالشکور ایزدي تښتېدلی او د تېښتې پر مهال له یوه موټر سره هم لګېدلی دی.
پولیس وايي، دا ښځه او بریدګر ښايي سره بلد و او دوی په دې برخه کې پلټنې کوي.
بي بي سي وايي، ۳۵ کلن ایزدی پر ۲۰۱۸ کال د جنسي جرم له امله محکوم شوی و.
ویل کېږي د نوموړي د کډوالۍ غوښتنه دوه ځلې ونه منل شوه، خو په ۲۰۲۱ او ۲۰۲۲ کې یې چې وویل، عیسوی شوی دی، نو کډوالي یې ومنل شوه.