د امریکا د مرکزي قوماندې له خوا پر اکس خواله رسنۍ خپرې شوې اعلامیه کې راغلي، چې د جمعې په ورځ د واشنګټن پر وخت د مازدیګر پر ۴:۰۰ بجو د متحده ایالاتو د مرکزي قوماندې ځواکونو په عراق او سوریه کې د ایران پورې تړلو ملیشو پر وړاندې هوايي بریدونه ترسره کړي دي.
په اعلامیه کې راغلي چې د امریکا پوځي ځواکونو له ۸۵ څخه ډیرې موخې په نښه کړي او په دغو عملیاتو کې د امریکا څخه تللې د اوږد واټن بم غورځونکې په ګډون بیلابیلې الوتکې شاملې وې. اعلامیه کاږي چې په دغو بریدونو کې له ۱۲۵ بیلابیلو بمونو کار اخیستل شوی و.
په اعلامیه کې راغلي، چې په دغو عملیاتو کې د قوماندې او کنټرول عملیاتي مرکزونه، د استخباراتو مرکزونه، د راکټونو، توغنديو او د بې پیلوټه الوتکو زیرمې، د لوژستیک او مهماتو د اکمالاتو مرکزوونه شامل دي چې د متحده ایالاتو او ایتلافي ځواکونو پر وړاندې د بریدونو په ترسره کولو کې ترې کار اخیستل کیده.
تر دې وړاندې د العربیه خبريی شبکې د راپور ورکړی و، چې په سوریه کې د ایران د اسلامي جمهوریت د ملاتړو وسله والو ډلو پر مرکزونو هوايي بریدونه شوي دي.
د سوریې د بشري حقونو د څار ډلې ویلي، چې د دغه هیواد په ختیځ کې د ایران په ملاتړ د ملیشو پر اتو مرکزونو بریدونو کې لږ تر لږه شپږ تنه وژل شوي دي.
د دغې ډلې په وینا، داسې ښکاري چې د سوریې په ختیځ کې دغه بریدونه د امریکايي ځواکونو له خوا شوي دي.
د سوریې په المیادین ښار کې د حیدریه او شبلي سیمې په هوايي بریدونو کې په نښه شوي دي. په دغو بریدونو کې د ایران اسلامي جمهوریت ملاتړو ډلو مرکزونه وشتل شوي دي.
د اسکای نیوز عربی څانګې ویلي، چې د سوریې په ختیځ کې د "فاطمیون" او "زینبیون" ملېشو اډې په دغو بریدونو کې ویشتل شوي دي. د "فاطمیون" او "زینبیون" ملېشو ملاتړ د ایران د اسلامی جمهوریت له خوا کیږي.
