یوه فرانسوۍ ښځه او د هغې افغان خاوند د دوو ماشومانو د سنتولو له امله په بند محکوم شوي
په فرانسه کې یوې محکمې، یوه فرانسوۍ ښځه او د هغې افغان خاوند افغانستان ته د دوو ماشومانو د وړلو او سنتولو له امله په لس میاشتو بند محکوم کړل.
په ۲۰۲۰ کال کې دغې مېرمنې خپل دوه زامن، چې عمرونه یې ۶ او ۱۰ کاله دي، د خپل پخواني خاوند له اجازې پرته، چې د دغو ماشومانو پلار دی، افغانستان ته وړي و.
فرانسې ته له ستنېدو وروسته، دغو دوو هلکانو شکایت کړی وو، چې په ناپاکو شرایطو کې سنت شوي دي. دوی ویلي، چې د غیر مسلکي کسانو له خوا د سنت کېدو له امله دوی فزیکي او رواني زیان رسول شوی دی.
د دغې ښځې مشر زوی د محکمې په غونډه کې ویلي، چې افغان پلار یې په افغانستان کې د اوسېدو پر مهال له هغه سره ناوړه چلند کړی دی.
محکمې، د خپلو ماشومانو ساتنې لپاره د دغې ښځې حق رد او خاوند یې هم د دریو کلونو لپاره له هغوی سره له لیدنې منع کړ.
همدا شان دغه جوړه هر یو ماشوم ته د لس زره یورو پر ورکولو محکومه شوي دي.
