د طالبانو د مالیې وزارت د دعوت او ارشاد ریاست د دغه وزارت له ټولو ریاستونو پوښتنه کړې چې د دې ډلې د مشر پخوانیو امرونو ته په پام یې کارمنان «څو فیصده برابر شوي دي.» دغه ریاست له ټولو ریاستونو غوښتي چې د سیرت او صورت، د لمانځه او د شریعت د پوره پابندي په هکله ډاډ ور کړي.
د طالبانو د مالیې وزارت د دعوت او ارشاد ریاست دا مکتوب یوه اوونۍ وړاندې صادر شوی او ګمرک ریاست ته لېږلې کاپي یې افغانستان انټرنشنل پښتو ته هم رسېدلې ده.
د سرچینو په خبره، ورته مکتوب د مالیې وزارت ټولو ریاستونو ته لېږل شوی دی.
د دغه مکتوب په یوه برخه کې راغلي، چې د طالبانو د ډلې رهبر د شفاهي امر او د امربالمعروف او نهي له منکر وزارت او د دعوت او ارشاد لوی ریاست د حکم په اساس د مالیې وزارت اړوند ټول ریاستونه «مونږ ته اطمینان راکړی چې ستاسو په ریاست کې څومره اصلاحات راغلي دي او د کارکوونکو سیرت او صورت څو فیصده برابر شوی دی.»
د دغه مکتوب په پله برخه کې یې د مالیې وزارت ټولو مامورینو ته خبرداری ورکړی چې خپل ځانونه په سنت طریقه برابر کړي:« د امربالمعروف وزارت محتسبین بیا بیا ګرځي او د مامورینو سیرت او صورت له نژدې ګوری نو که د دوي په اړه هره پرېکړه وشوه مسوولیت یې پر خپله غاړه دی.»
په افغانستان کې د طالبانو د بیا ځلي واک ته رسېدو سره دغې ډلې خپلو کنټرول لاندې دولتي ادارو کې پر مامورینو محدودیتونه لګولي دي.
څه مهال مخکې طالبانو د ملي تلویزیون پر ویاندانو او خبریالانو خولۍ او لونګۍ پر سر کول جبري کړل.
یو شمیر نظر خاوندان په دې باور دي چې طالبان په دغو محدودیتونو سره غواړي د پخواني حکومت مامورین له دندو وشړي او پرځای یې هغه طالبان وګماري چې له مدرسو فارغ شوي وي او تېره شل کلنه جګړه کې یې ورسره برخه اخیستې وي.
