د ترکیې د بیتلیس ښار سیمه ییزو چارواکو نن وویل، ۵۸ افغان کډوال یې چې په یوه لارۍ کې سپاره وو، د تانریار د مرکزي کلي په پوسته کې نیولي دي. د راپورونو پر بنسټ د دغه هېواد د پولیسو په عملیاتو کې دوه کسان د «انساني قاچاق» په تور نیول شوي دي.
د بیتلیس د والي دفتر په خپل اېکس کې لیکلي چې پولیسو دغه پناه غوښتونکي وړمه ورځ ونیول.
په خبرپاڼه کې ویل شوي چې دوه نیول شوي کسان عدلي او قضايي ارګانونو او پاتې نور پناه غوښتونکي د کډوالۍ چارو ریاست ته سپارل شوي دي.
د تركيې د چارواكو له خوا د اعلان شويو معلوماتو له مخې، په ټول هېواد كې د كډوالو د نيولو او شړلو عمليات دوام لري.
په دې وروستیو کې د دغه هېواد پولیسو د بیتلیس ښار په همدې پوسته کې په یوه لارۍ کې ۷۶ افغان کډوال نیولي او د کډوالو توقیف ځایونو ته یې سپارلي وو.
