د ملګرو ملتونو د ماشومانو د ملاتړ صندوق (UNICEF) ویلي چې په ۲۰۲۳ کال کې یې ۷،۳ میلیونو وګړو ته د ژوند ژغورنې روغیتايي او خوراکي خدمتونه وړاندې کړي.
دغه اداره وايي، هڅه کوي چې د مور او ماشوم د مړینې کچه راکمه کړي.
د ملګرو ملتونو د ماشومانو د ملاتړ صندق (یونېسف) د دوشنبې په ورځ د (سلواغې۱۶مه) په خپله اېکس پاڼه لیکلي چې په ۲۰۲۳ کال کې یې په افغانستان کې ۷،۳ میلیونه وګړو ته د ژوند ژغورنې روغتیايي او خوراکي خدمتونه وړاندې کړي.
همدارنګه دغه اداره وايي، ۹۵۰۰ قابله ګانې او روغتیا پالانې یې، مور او ماشوم ته په روغتیايي برخه کې د خدمتونو وړاندې کولو په برخه کې روزلې دي.
د ملګرو ملتونو د ماشومانو د ملاتړ صندوق له لوري په اېکس پاڼه خپره شوې ویډیو کې روغتیا پاله سیمین وايي، هغه ښځې چې دوی ته د ناروغۍ پر مهال ورځي، د هغوی په بدن کې اوسپنه کمه ده او هغوی بشپړو خوړو ته لاسرسۍ نه لري. نوموړي وايي: «په روغتونونو کې د ښځینه کارکوونکو کمښت یو له لویو ستونزو څخه ده. ډیر ناروغان موږ ته مراجعه کوي خو که ښځینه کارکوونکي ولرو نو ښه خدمتونه به ورته وړاندي کړو.»
د ملګرو ملتونو د ماشومانو ملاتړ صندوق له لوري د افغانستان په بېلابېلو ولایتونو کې د مور او ماشوم د ساتنې او روغتیايي خدمتونو وړاندې کولو په برخه کې روغتونونه جوړ شوي. خو لاهم په افغانستان کې د زیږون پر مهال د مور او ماشوم د مړینې پيښې ډیرې دي.