د خیبرپښتونخوا په ډېره اسمعیل خان کې د وسله والو په برید لس پولیس وژل شوي دي

AP ۱۴۰۲ سلواغه ۱۶

پاکستانۍ رسنۍ وايي، د خیبرپښتونخوا په ډېره اسماعيل خان کې دپوليسو په یوه مرکز د بريد له امله لس پوليس وژل شوي او شپږ نور ژوبل شوي دي.

تېره شپه ناوخته د ډېره اسمعیل خان په درابان سيمه کې وسله والو په پوليسو دغه برید کړی.

ځايي پولیسو نن دوشنبه د (سلواغې ۱۶مه) پاکستاني رسنیو ته ویلي چې تېره شپه درې بجې وسله والو د پوليسو پر مرکز د درنو او سپکو وسلو بريد وکړ او دوی ته یې مرګژوبله اړولې ده.

ټپي شوي پولیس ور څېرمه روغتون ته د درملنې لپاره لیږدول شوي دي.

پوليس رسنیو ته ویلي چې پر دغه مرکز له څو خواوو بريدونه شوي، درنې ډزې پرې شوې او لاسي بمونه هم ورغورځول شوي، چې وروسته پوليسو هم ځوابي ډزې کړې خو وسله وال د شپې په تياره کې ترې تښتېدلي دي.

پوليسو پاکستاني رسنیو ته ویلي چې سیمه کلابنده شوې او د پلټنې عملیات روان دي، وايي دغې سیمې ته نور ځواکونه هم رسیدلي دي.

د دغه برید مسوولیت لا کومې ډلې نه دی منلی.

ډېره اسمعیل خان د خیبرپښتونخوا د نورو سیمو پرتله په امنیتي لحاظ ډیره ناامنه سیمه ده چې ډیری مهال پر پولیسو او حکومتي چارواکو باندې د بریدونو راپورونه ترې ورکړل کیږي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ