د افغانستان په چارو کې د ملګرو ملتونو ځانګړي همغږي کوونکي د طالبانو د ریاست الوزرا له سیاسي مرستیال سره په لیدنه کې ویلي، چې هیڅوک د طالبانو د نظام د ړنګېدو په لټه کې نه دي. د ملګرو ملتونو دغه چارواکي ویلي، چې طالبان باید ځینې نړۍوال قوانین او کنوانسیونونه مراعات کړي.
د افغانستان په چارو کې د ملګرو ملتونو ځانګړي همغږي کوونکي فریدون سینیرلي اوغلو کابل ته د خپل سفر په ترڅ کې د طالبانو د ریاست الوزرا له سیاسي مرستیال سره وکتل.
د طالبانو له لوري په خپره شوې خبرپاڼه کې راغلي، چې سینیرلي اوغلو په دې ناسته کې وویل، چې د دوحې په راتلونکې ناسته کې به د افغانستان په اړه ښې پرېکړې وشي.
د دغې خبرپاڼې پر بنسټ؛ د افغانستان لپاره د ملګرو ملتونو ځانګړي همغږي کوونکي ویلي، چې د امریکا او اروپايي هېوادونو په ګډون نړۍواله ټولنه له طالبانو سره اړیکو لرلو ته لېواله دي.
د ملګرو ملتونو ځانګړي همغږي کوونکي همداراز وویل، چې نړۍوال بانک به په نږدې راتلونکي کې د افغانستان په اړه یوه غونډه جوړه کړي.
د خبرپاڼې د معلوماتو له مخې؛ ټاکل شوې د نړۍوال بانک په دې غونډه کې د افغانستان د بانکي سکتور د پراختیا، د بندیزونو د ختمولو او په افغانستان کې د نړۍوال بانک د پاتې پروژو د بیا پیلولو په اړه خبرې وشي.
د طالبانو د لومړي وزیر سیاسي مرستیال مولوي عبدالکبیر له ښاغلي سینیرلي اوغلو سره په لیدنه کې د دوحې په غونډه کې د افغانستان د بیارغونې، بشري مرستو او د بانکي بندیزونو د لرې کولو په برخه کې پر اقداماتو ټینګار کړی دی.
فریدون سینیرلي اوغلو تر دې مخکې د طالبانو د بهرنیو چارو له وزیر امیرخان متقي سره هم لیدلي وو او د دوحې د ناستې په اړه یې ورسره خبرې کړې وې.
په دې کتنه کې امیرخان موتقي وویل، چې د موضوع او جوړښت په اړه له معلوماتو تر لاسه کولو وروسته به د دوحې په غونډه کې د ګډون پرېکړه وکړي.
ټاکل شوې د افغانستان په اړه د دوحې غونډه د یکشنبې او دوشنبې په ورځ د ډسمبر په ۲۹ او ۳۰مه جوړه شي.
سراج الدین حقاني:
د طالبانو د کورنیو چارو وزیر سراج الدین حقاني د هغو طالب مشرانو په ډله کې دی، چې د ملا هبت الله فرمان یې تر پښو لاندې کړی دی او خپل خپلوان یې په لوړو څوکیو ګومارلي دي.
د افغانستان انټرنشنل ـ پښتو ته رسېدلو معلوماتو پر بنسټ د طالبانو د کورنیو چارو وزیر سراج الدین حقاني خپل ورور حافظ عزیز حقاني په کورنیو چارو وزارت کې خپل خاص سکرتر په توګه مقرر کړی، بل ورور یې انس حقاني له افغان شخصیتونو سره د تماس په کمېسیون کې غړیتوب لري، تره یې خلیل الرحمن حقاني د طالبانو د کډوالو او بېرته راستنېدونکو چارو وزیر، ماما یې مالي خان د ملي دفاع وزارت مرستیال په توګه کار کوي.
امیر خان متفي
د طالبانو د بهرنیو چارو وزیر امیر خان متقي خپل ورور محمد نبي متقي په بهرنیو چارو وزارت کې د ځانکړي سکرتر په توګه ګومارلی دی، بل ورور یې احمد الله متقي د هرات د اطلاعاتو او کلتور ریاست رییس په توکه کار کوي، بل ورور یې امان الله افغان د طالبانو په فرهنګي کمېسیون کې غړیتوب لري، عبدالله متقي چې د کابل په شش درک کې د ریاض العلوم مدرسې مسوولیت په غاړه لري؛ خو افغانستان انټرنشنل ـ پښتو داسې انځورونه ترلاسه کړي دي، چې عبدالله متقي په رسمي ناستو کې د مشرانو میلمنو په لومړی قطار کې ناست وي.
شهاب الدین دلاور
د طالبانو د کانونو او پټرولیم وزیر د خپلې کورنۍ څو تنه په دولتي دندو ګومارلي دي.
د شیخ شهاب الدین دلاور زوي مغفور الله شهاب په ازبکستان کې د طالبانو سفیر ټاکل شوی، بل زوي یې روح الله شهاب د طالبانو د ریاست الوزرا اقتصادي معاونیت کې رییس دی، وراره یې مهدي الله احساس په بهرنیو چارو وزارت کې د یو ریاست معاون او زوم یې شمش الدین احمدي په کابل ښاروالۍ کې د دويمې ناحیې د رییس په توګه کار کوي.
د طالبانو د کانونو او پټرولیم وزیر شهاب الدین دلاور زوي مغفور الله شهاب په ازبکستان کې د طالبانو د سفیر په توګه له ټاکل کېدو سره د طالبانو ترمنځ په ټولنیزو رسنیو کې تاوده بحثونه پیل شوي دي.
د طالبانو یو غړی عبدالحق عمر پر خپلې اېکس پاڼه ملا هبت الله مخاطب کړی دی او ورته یې لیکلي، چې ستا فرمانونه مشران تر پښو لاندې کوي، کشران یې په سر سترګو مني.
د ټولنیزو رسنیو دغه طالب فعال لیکي: "ودې ویل دویم واده مه کوي؛ خو ډېرو غټانو درېیم وکړ، ودې ویل څوک د فرابت او انډیوالیزم پر بنیاد په دنده مه ګوماری خو چا سر نه کړ خلاص، ودې ویل د ولس پر مخ دروازې خلاصې کړئ خو دوی تر هغه لا ښې پسې بندې کړې."
دی د طالب مشرانو په اړه وايي، چې اکثریت لګیا دي پیسې جمع کوي او ماڼۍ جوړوي، جایدادونه ډېروي او له خلکو څخه د شرینۍ او تحفې په نوم رشوتونه اخلي.
یو شمېر طالب پلویان په ټولنیزو رسنیو لیکي، چې د ټولو وزیرانو ، معینانو، ریسانو، والیانو او قوماندانانو همدا حال دی.
د موندونو پر بنسټ د طالبانو د کورنیو چارو وزارت مرستیال محمد نبي عمري چې د خوست اوسېدونکی دی، خپل ورور یې حافظ راشید د خوست امنیه قوماندان په توګه ټاکلی دی.
د افغانستان انټرنشنل ـ پښتو د راپورونو پر اساس د خوست په امنیه قوماندانۍ کې زیاتره د کورنۍ غړي په بېلابېلو ځایونو کې ګومارلي دي.
د تر لاسه شویو معلوماتو پر بنسټ؛ د د طالبانو د اوبو او برېښنا وزیر عبدالطیف منصور زوي عارف الله منصور د افغانستان د سرې میاشتې کې د رییس په توګه کار کوی.
دا مقررۍ په داسې حال کې ترسره کیږی، چې ملا هبت الله اخواندزاده په یوه فرمان کې د طالبانو څخه غوښتي وو، چې تر خپل واک لاندې ادارو کې خپلوان او انډيوالان د اړیکو په بنسټ ونه ګوماري.
د ملا هبت الله له دغه فرمان څخه وروسته یو شمېر طالب وزیرانو په خپلو منځونو کې داسې پرېکړې ته ورسېدل چې دوی به د یو بل د کورنۍ غړي په خپلو وزارتونو کې ګوماري.
د طالبانو د غړو شکایتونه دا دي، چې د دوی مشرانو د خپلوۍ او ملګرتیا په بنسټ ګومارنې کړي دي.
د ملا هبت الله د فرمانونو او حکمونو د تعقیب او نظارت ریاست څه موده وړاندې د طالبانو ټولو ملکي او نظامي ادارو ته لارښونه کړې وه، چې د دې ډلې د مشر له فرمان څخه اطاعت وکړي، چې وايي؛ د خپلوي او انډيوالۍ پر بنسټ دې په ادارو کې څوک نه ګوماري.
د دې مکتوب له مخې، چې افغانستان انټرنشنل ته هم رسېدلی و، د خپلوالۍ له مخې د اشخاصو ګومارل د "الله د ناراضتۍ او عذاب سبب کیږي".