د بریتانیا پولیس وایي، په لندن کې د کیمیاوي برید شکمن کس ښايي مړ شوی وي

AP ۱۴۰۲ سلواغه ۲۰

د بریتانیا پولیس وايي، په دې باور دي، چې په لندن کې پر یوې مېرمنې او د هغې پر دوو لوڼو شکمن بریدګر عبدالشکور ایزدي ښايي د تیمز سیند ته له کښته کیدو وروسته په اوبو کې مړ شوی وي.

د پولیسو په اعلامیه کې راغلي:‌ "د شپې ناوخته او د کال په دې وخت کې، هغه د پول له منځ څخه ځان اوبو ته اچولی، حالاتو ته په کتو داسې ښکاري چې د ایزدي د ژوندي پاتې کیدو چانس خورا کم دی."

له دغه برید وروسته، ۶۶ کلنه مور چې د کیمیاوي برید موخه وه، له خپلو لوڼو سره روغتون ته وړل شوې وه.

د هغه لوڼې له روغتون څخه رخصت شوې، خو هغه لا هم په روغتون کې ده او دا احتمال شته چې خپله یوه سترګه له لاسه ورکړي.

پولیس باور لري چې عبدالشکور یزدي له دې ښځې سره اړیکې درلودې، خو وروسته جلا شوي وو. ویل کیږي چې یزدي له برید مخکې د هغې د لیدلو هڅه کوله.

له دغه برید وروسته په ټوله بریتانیا کې د دغه افغان کډوال د لټون عملیات پیل شوي و.

تر دې مخکې د پولیسو له لوري ویل شوي وو چې ښايي ځینې کسان وي چې د دغه شکمن په پټولو کې مرسته کوي، خو اوس پولیسو اعلان کړی چې له ایزدي سره چا اړیکه نه ده نیولې.

پوليس وايي،‌ د امنیتي کمرو د سلګونو ویډيوګانو تر کتلو وروسته دې نتيجې ته رسيدلي چي عبدالشکور ايزدي له بل چا سره اړیکه نه لري.

د امنیتي کمرو د ویډیګانو له مخې ، نوموړی په وروستي ځل د چهارشنبې په ورځ، د جنوري ۳۱مه د شپې ۱۱:۳۰ دقیقې د چیلسي له پله څخه تېر شوی دی.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ