د بښنې نړيوال سازمان: د ښځو د حقونو یوه فعاله د طالبانو له خوا د شکنجې له خطر سره مخ ده
د بښنې نړیوال سازمان ویلي، چې د ښځو د حقونو فعاله منیژه صدیقي لا هم له کوم تور پرته د طالبانو په زندان کې ده او د شکنجې او ناوړه چلند له خطر سره مخامخ ده.
د بښنې نړیوال سازمان ویلي، چې د ښځو د حقونو فعاله منیژه صدیقي لا هم له کوم تور پرته د طالبانو په زندان کې ده او د شکنجې او ناوړه چلند له خطر سره مخامخ ده.
د بشري حقونو دغه سازمان پر اېکس خواله رسنۍ خپور کړي پیغام کې، یو ځل بیا د مېرمن صدیقي د سمدستي او بې شرطه خوشې کېدو غوښتنه کړې ده.
طالب جنګیالیو د تلې په ۱۷ مه د ښځو د حقونو فعاله منیژه صدیقي ونیوله او د لیندۍ په ۱۴ مه یې د کابل پلچرخي زندان ته انتقال کړه.
د بخښنې نړیوال سازمان د خپلو موندنو پر بنسټ ویلي، چې مېرمن صدیقي د خپل توقیف مودې پر مهال په کوم جرم نه ده تورنه شوې، خو خپلې کورنۍ سره د لیدلو او د مدافع وکیل د لرلو له حق محرومه پاتې شوې. دغه سازمان په خپل نوي پيغام کې د مېرمن صديقي د شکنجې او ناوړه چلند د خطر په اړه ژوره اندېښنه ښودلې ده.
طالبانو د ۱۴۰۰ کال د زمري په میاشت کې د واک ترلاسه کولو وروسته، پر ښځو پراخ بندیزونه لګولي او نجونې او ښځې یې له زده کړې، کار او ټولنیزو فعالیتونو څخه بې برخې کړي دي.
د دې بندیزونو په غبرګون کې د ښځو د حقونو فعالانو په کوڅو او سړکونو لاریونونو کې د دغې ډلې پر سیاستونو اعتراض کړی.
طالبانو دغو اعتراضونو ته په فزیکی تاوتریخوالی او تهدید ځواب ورکړی او زیات شمېر لاریون کوونکې ښځې یې بندیانې کړي دي.
سيمه ييزو سرچينو افغانستان انټرنشنل ته ويلي، طالبانو د دايکنډي ولایت دوه پخواني پوليس په میدان وردګو کې نيولي دي.
د سرچينو د معلوماتو له مخې، د جمهوریت تر نسکورید وړاندې رضا مجاهدزاده د دایکنډي د پاتو ولسوالۍ امنيه قوماندان او رضا حکمتيار د همدې ولایت د شهرستان ولسوالۍ سرپرست امنيه قوماندان و.
د سرچينو په وینا، طالبانو د پنجشنبې په ورځ (د سلواغې ١٩مه) رضا مجاهدزاده د ميدان وردګو ولايت په مرکز ميدان ښار کې له موټره ښکته کړی و. د دې ډلې وسله والو رضا حکيميار دوه ورځې مخکې د ميدان وردګو ولايت د جلريز ولسوالۍ بازار ته څېرمه نیولی و.
سرچینې وايي، وروسته له هغه چې طالبانو د افغانستان واک تر لاسه کړ، رضا مجاهدزاده د سیمه ییزو طالبانو په غوښتنه د دایکنډي ولایت په میرامور ولسوالۍ کې له طالبانو سره همکارۍ ته دوام ورکړ او څه مودې وروسته له دندې ګوښه شو. دغو سرچینو ویلي، چې ښاغلي مجاهدزاده له طالبانو سره له دندې له ختمیدو وروسته د دایکنډي ولایت او کابل ترمنځ موټر چلاوه.
د سيمه ييزو سرچينو د معلوماتو له مخې، رضا حکمتيار د یوې مودې لپاره د دايکنډي ولسوالۍ امنيه قوماندان و او د تېر حکومت تر نسکورېدو وړاندې يې په دې ولسوالۍ کې د جنايي مدير په توګه دنده ترسره کوله. هغه د طالبانو له واکمنۍ وروسته شخصي کاروبار کاوه.
رضا مجاهدزاده او رضا حکمتيار د دایکنډي ولایت د میرامور ولسوالۍ اوسېدونکي دي.
طالب چارواکو د دغو دوو پخوانيو پوليسو د نيولو په اړه څه نه دي ويلي.
سره له دې چې طالبانو عمومي عفوه اعلان کړې وه، خو په تېرو دوو کلونو کې د پخواني حکومت سلګونه سرتېري او کارکوونکي نيول شوي او د راپورونو له مخې په ځينو مواردو کې شکنجه شوي او یا وژل شوي دي.
ملګرو ملتونو په وار وار د طالبانو له خوا د پخوانیو پوځیانو پر وژلو نیوکه کړې ده.
د بریتانیا پولیس وايي، په دې باور دي، چې په لندن کې پر یوې مېرمنې او د هغې پر دوو لوڼو شکمن بریدګر عبدالشکور ایزدي ښايي د تیمز سیند ته له کښته کیدو وروسته په اوبو کې مړ شوی وي.
د پولیسو په اعلامیه کې راغلي: "د شپې ناوخته او د کال په دې وخت کې، هغه د پول له منځ څخه ځان اوبو ته اچولی، حالاتو ته په کتو داسې ښکاري چې د ایزدي د ژوندي پاتې کیدو چانس خورا کم دی."
له دغه برید وروسته، ۶۶ کلنه مور چې د کیمیاوي برید موخه وه، له خپلو لوڼو سره روغتون ته وړل شوې وه.
د هغه لوڼې له روغتون څخه رخصت شوې، خو هغه لا هم په روغتون کې ده او دا احتمال شته چې خپله یوه سترګه له لاسه ورکړي.
پولیس باور لري چې عبدالشکور یزدي له دې ښځې سره اړیکې درلودې، خو وروسته جلا شوي وو. ویل کیږي چې یزدي له برید مخکې د هغې د لیدلو هڅه کوله.
له دغه برید وروسته په ټوله بریتانیا کې د دغه افغان کډوال د لټون عملیات پیل شوي و.
تر دې مخکې د پولیسو له لوري ویل شوي وو چې ښايي ځینې کسان وي چې د دغه شکمن په پټولو کې مرسته کوي، خو اوس پولیسو اعلان کړی چې له ایزدي سره چا اړیکه نه ده نیولې.
پوليس وايي، د امنیتي کمرو د سلګونو ویډيوګانو تر کتلو وروسته دې نتيجې ته رسيدلي چي عبدالشکور ايزدي له بل چا سره اړیکه نه لري.
د امنیتي کمرو د ویډیګانو له مخې ، نوموړی په وروستي ځل د چهارشنبې په ورځ، د جنوري ۳۱مه د شپې ۱۱:۳۰ دقیقې د چیلسي له پله څخه تېر شوی دی.
ایراني رسنیو د جمعې په ورځ (د سلواغې ۲۰مه) په سوریه کې د فاطمیون د ډلې د وژل شویو وسله والو د جنازې د مراسمو یوه ویډیو خپره کړه چې په ورامین ښار کې ترسره شوې ده.
تر دې وړاندې د فاطمیون ډلې د پنځو غړو د جنازې لپاره د سلواغې په ۱۷مه نېټه په مشهد کې هم مراسم جوړ شوي وو.
په هغو انځورونو کې چې د جمعې د ورځې د جنازې له مراسمو څخه خپاره شوي، لیدل کیږي چې د وژل شوو کسانو خپلوان او کورنۍ د دوی پر تابوت ژاړي.
د فاطمیون ډلې د وژل شوو غړو د کورنیو د ماتم په اړه د خپرې شوې دغې نوې ویډیو د ثبت دقیقه نېټه معلومه نه ده.
د سپاه پاسداران اړوند رسنیو راپور ورکړی، چې د شنبې په ورځ (د سلواغې ۱۴مه)په سوریه کې د امریکا د توغندیو په بریدونو کې د فاطمیون ډلې یو جګپوړی غړی او څو نور افغان جنګیالي وژل شوي دي.
د فاطمیون ډله یوه نیمه پوځي ځواک دی چې د قدس ځواک تر څارنې لاندې فعالیت کوي او ډېری غړي یې په ایران کې مېشت افغان کډوال دي.
قدس ځواک د سپاه پاسداران انقلابي څانګه ده.
دغه وسله وال په تېرو کلونو کې د بشار الاسد د حکومت په پلوۍ د سوریې د جګړې پر مهال دغه هېواد ته استول شوي وو.
په ۲۰۱۹ کال کې د افغانستان پخواني حکومت د ایران له اسلامي جمهوریت څخه وغوښتل چې د فاطمیون ډله منحل کړي.
هغه مهال چارواکو ټینګار کاوه چې په نیابتي جګړو کې د افغان مهاجرینو کارول له نړۍوالو قوانینو سره سمون نه لري.
د بشري حقونو څارونکو او فعالانو تل د ایران د اسلامي جمهوریت پر هغې کړنې نیوکه کړې چې په ایران کې د افغان کډوالو د اوسیدو له خرابو شرایطو څخه په ګټې اخیستنې سره، دوی د سوریې په شمول د سیمې جګړو ته د ګډون لپاره هڅوي.
د هلمند نهر سراج کې سرچینو او اوسیدونکو افغانستان انټرنشنل ـ پښتو ته وویل، د طالبانو د مشر ملا هبت الله د ځانګړو ځواکونو قوماندان عبدالاحد طالب د مدرسې او جومات په نوم درې سوه جریبه دولتي او د کښت ځمکه بې له «دولتي» قرارداد ولکه کړې او په څنګ کې یې ور سره دوکانونه هم جوړ کړي دي.
دغه ځمکه د هلمند نهر سراج ولسوالۍ کې د لشکرګاه او کندهار دو راهي سړک سره د هلمند لور ته په ښې لاس کې پرته ده.
د سیمي اوسیدونکي وايي دا ځمکه دولتي ده او دغه طالب قومندان په دولتي ځمکه کې نوره ابادي شروع کړې ده.
هغه ویډیوګانې چې د سیمې اوسیدونکو افغانستان انټرنشنل ـ پښتو ته لیږلي دي، په کې لیدل کیږي، چې د حضرت بلال جامع په نوم جومات جوړ شوی دی.
د ویډیو په بله برخه کې مارکیټونه هم لیدل کیږي چې تازه جوړ شوي دي.
د نهر سراج لسوالۍ د لشکرګاه او کندهار دو راهي د سیمې اوسیدونکي وايي چې له کلونو راهیسې یې دغه دولتي ځمکه کښت کوله، خو اوس یې د ملا هبت الله د ځانګړو ځواکونو قوماندان مولوي عبدالاحد طالب وسلوال نه پرېږدي چې خپل کښت شوي غنم هم اوبه وکړي.
په ویډیو کې دا هم ښکاري چې د دې ځمکې په یو برخه کې غنم تازه راشنه شوي دي.
په هلمند کې یوې ځايي سرچینې افغانستان انټرنشنل ـ پښتو ته وویل چې په دغه غصب شوې ځمکه کې یوازې د ملا هبت الله د ځانګړو ځواکونو قوماندان شریک نه دی، بلکې د هلمند ځینې اوسني چارواکي هم په دغه ځمکه کې شریکان دي.
مولوي عبدالاحد طالب، په کندهار کې مېشت د طالبانو مشر ملا هبت الله ته نژدې او با اعتباره کس بلل کیږي، دی له دې وړاندې د هلمند والي و.
افغانستان انټرنشنل ـ پښتو ته سیمه ییز خلک وايي مولوي عبدالاحد طالب له کوم «دولتي قرارداد» پرته په خپلسر په دغه سیمه کې درې سوه جریبه دولتي ځمکه د خپلو وسلوالو په زور لاندې کړې ده.
دا راپورونه په داسې حال کې نشریږي چې نه یوازې د طالبانو دغه لوړ رتبه طالب چارواکي د مدرسې په نوم ځمکه غصب کړې، بلکې له دې وړاندې افغانستان انټرنشنل ـ پښتو د طالبانو د دفاع وزارت مرستیال ملا افضل اخوند د کندهار ښار په اوومه ناحیه کې پر دولتي ځمکه د مدرسې مخې او څنګ ته تر ۵۰ زیاتو دوکانونو له جوړولو څخه پرده پورته کړې وه.
څو ورځې وړاندې له کندهار څخه سیمه ییزو سرچینو افغانستان انټرنشنل ـ پښتو ته د څو ویډیوګانو په استولو سره وویل، چې د طالبانو د دفاع وزارت مرستیال ملا فاضل وسله والو، د زاړه ښار نارنج کلا ته څېرمه، د عامو خلکو یوه هدیره قبضه کړې او غواړي شخصي کور پرې جوړ کړي.
د امریکا د عدلیې وزارت ځانګړي پلټونکي ویلي، چې جو بایډن په ویرجینیا کې په خپل کور کې د افغانستان د جګړې په اړه محرم معلومات ساتلي وو. د راپور له مخې، بایډن تر مرستیال ولسمشر کیدو وروسته د ملي امنیت د نورو مسالو اسناد هم په "قصدي توګه" په کور کې ساتل.
د امریکا د ځانګړي استازي رابرټ هور په وینا، په دې اسنادو کې په ۲۰۰۹ کال کې د امریکا د هغه وخت ولسمشر بارک اوباما ته په لاس لیکل شوی یادښت او په افغانستان کې د پلان شويو پوځیانو د زیاتولو مخالفت او د استخباراتو او ملي امنیت د غونډو په اړه په لاس لیکل شوي یادښتونه شامل وو.
خو ویل شوي چې ښاغلی بایډن به له جنایي تورونو سره مخامخ نه شي.
د متحده ایالاتو د عدلیې وزارت ځانګړي پلټونکي جو بایډن "د ښه نیت او کمزورې حافظې سړی" بللی دی.
د راپور له مخې، د تحقیقاتو په جریان کې په مرکو کې، له بایډن دا هېرېږي چې کله هغه مرستیال و او کله یې زوی مړ شو.
د امریکا د عدلیې وزارت په راپور کې ویل شوي چې جو بایډن په قصدي ډول د خپل مرستیال ولسمشر د دورې محرم اسناد په خپل کور او دفتر کې ساتلي او افشاء کړي، خو پر ده هېڅ تورونه نشته.
د عدلیې وزارت ځانګړي وکیل رابرټ هیر په خپل راپور کې لیکلي چې کله د څارنوالۍ ټیم له خوا مرکه وشوه د بایډن حافظه "سخته کمزورې" وه.
په ورته وخت کې، دې راپور کې یادونه شوې ده چې دا خورا حساس معلومات ممکن ول ورک شوي وای یا د امریکا د دښمنانو لاس ته ورغلي وای، یا د بایډن کړنو ملي امنیت په خطر کې اچولی وای.
د بایډن وکیلانو د دې راپور په اړه په خپلو څرګندونو کې لیکلي، دې ته په پام سره چې بایډن باید د تېر کال د پېښو په اړه وضاحت ورکړی وای، خو د یاد نشتوالی غیر معمولي موضوع نه وه او دا ډول موادو ته باید د عدلیې وزارت راپور کې ځای ور کړل شوی نه وای.
بایډن په ویرجینیا کې د عدلیې وزارت د ځانګړي وکیل د راپور په ځواب کې په یوې وینا کې وویل: "زما حافظه ښه ده."
د تحقیق کونکو نظر ته په غبرګون کې چې بایډن د خپل زوی د مړینې وخت په یاد نه وو، هغه وویل: "هغه څنګه دا جرئت لري چې دا موضوع راپورته کړي. "په صادقانه توګه، کله چې دوی له ما څخه دا پوښتنه وکړه، ما خپل ځان ته وویل چې دا د دوی له ناوړه کار سره هېڅ تړاو نه لري."
جو بایډن دې ته په اشارې سره چې له تحقیقاتي ټیم سره یې همکاري کړې او محرم اسناد یې بېرته ورکړي دي زیاته یې کړه، چې ټرمپ برعکس کار وکړ.
ډونلډ ټرمپ له یوې خوا د محرمو اسنادو د ساتلو په تړاو د جوبایډن پر ضد د تورونو لرې کولو او له بلې خوا پر ده د ورته تورونو دوام ته په اشارې وویل چې د امریکا قضایی سیسټم دوه مخی دی او "په خپله خوښه" خلک محاکمه کوي.
ټرمپ د خپل ځان په وړاندې د څلورو جرمي شکایتونو په اړه وايي د محرمو اسنادو د ساتلو، دوسیه یوه سیاسي انګیزه ده او بایډن د دې شکایتونو تر شا دی.
جمهوري غوښتونکي سناتور جوش هولي په اېکس ټولنیزې شبکې لیکلي:"د جو بایډن چې دا په یاد نه دي چې هغه کله د ولسمشر مرستیال و ، نو هغه څنګه د نورو څلورو کلونو لپاره د متحده ایالاتو د ولسمشر کیدو وړ دی؟"
تر هغه چې په ۱۴۰۱ کال کې دایف بي ای جاسوسانو په فلوریډا کې د مار-اې-لګو په نوم د ټرمپ ماڼۍ تلاشي کړه او لسګونه محرم اسناد یې وموندل، ټرمپ د دغو اسنادو له بېرته ورکولو ډډه کړې وه. دا عمل د دې لامل شو چې ټرمپ او د هغه دوه کارمنان د عدالت د خنډ ګرځیدو د هڅې په تور محاکمه شي.
ټرمپ د دغو تورونو په وړاندې خپل ځان بې ګناه بللی دی.
په پام کې ده چې ټرمپ په مې میاشت کې په دې تړاو محاکمه شي، خو د محکمې د ځنډیدو احتمال شته.