د پاکستان پوځ د عامه اړیکو دفتر اعلان وکړ، چې په بلوچستان ایالت کې د وروستیو دوو خونړیو چاودنو طراح وژل شوی دی. د دغه دفتر د خبرپاڼې له مخې، ابو حمزه خراساني د داعش ډلې غړی و او د پاکستاني پوځیانو په عملیاتو کې ووژل شو.
د تېرې چهارشنبې په ورځ " کلای سیف الله" او "پشین" سیمو کې د ټاکنیزو نوماندانو دفترونو ته څېرمه چاودنو لږ تر لږه ۲۶ کسان ووژل.
د پاکستان د وسله والو ځواکونو د عامه اړیکو دفتر د معلوماتو له مخې، د داعش دغه غړی د امنیتي ځواکونو له خوا تر تعقیب لاندې و او غوښتل یې، چې په بلوچستان ایالت کې نور بریدونه هم ترسره کړي.
د یاد دفتر خبرپاڼه زیاتوي، چې د امنیتي ځواکونو او اطلاعاتي ارګانونو د پر وخت او چټکو اقداماتو له امله، دغه کس په کلای سیف الله کې پیدا او وروسته بیا د امنیتي ځواکونو د عملیاتو په پایله کې ووژل شو.
د چهارشنبې ورځ خونړۍ چاودنې د پاکستان له سرتاسري ټاکنو یوه ورځ مخکې وشوې. دغو چاودنو په پاکستان کې د ټاکنو د امنیت په اړه پراخې اندېښنې راوپارولې.
د پاکستان حکومت د ټاکنو په ورځ دغه هېواد کې د مخابراتي شبکو او انټرنیټ بندولو او همدارنګه له افغانستان او ایران سره د ګډو پولو د تړلو په ګډون، پراخ او بې ساري امنیتي تدابیر هم نیولي وو.
