امریکا: موږ د پاکستان د ټاکنو په بهیر کې د لاسوهنو د ادعاوو په اړه اندېښمن یو

AP ۱۴۰۲ سلواغه ۲۱

د امریکا د بهرنیو چارو وزارت ویاند متیو مېلر وایي، ټاکنیز تاوتریخوالی، د بشري حقونو پر وضعیت لګول شوي بندیزونه، بنسټیرې خپلواکۍ او د ټاکنو په بهیر کې پر انټرنېټ او ټیلیفوني اړیکو بندیزونه هغه څه دي چې دوی یې غندنه کوي.

د امریکا دغه غبرګون له هغې وروسته مخې ته راځي چې تېره ورځ د ملاکنډ په شانګله ولسوالۍ کې د تحریک انصاف ګوند پلویانو په ټاکنو کې د درغلیو پر ضد لاریون وکړ او وروسته له پولیسو سره په اخ و ډب کې لږ تر لږه درې کسان ووژل شول او ۱۲ نور یې ټپیان شول.

بله غاړه د بریتانیا د بهرنیو چارو وزیر ویلي، چې د پاکستان په ټاکنو کې د عدالت د ټینګښت او عمومیت په اړه اندېښنې ډېرې دي.
د بریتانیا د بهرنیو چارو وزیر ډیویډ کامرون ویلي، لا هم نه پوهېږي چې په پاکستان کې ترسره شوې ټاکنې څومره عادلانه او سرتاسري وې.
هغه په دغو ټاکنیزو سیالیو کې د ټولو ګوندونو نه ګډون، د ټاکنو په بهیر کې د انټرنېټ پرې کول او د ټاکنو د پایلو په اعلانولو کې ځنډ د خواشینۍ وړ بللی.
تر دې وړاندې د سولې د نوبل جایزې ګټونکې ملالې یوسفزۍ هم د پاکستان د ټاکنو په اړه ویلي و، چې دغه هېواد ازادو، رڼو او عادلانه ټاکنو ته اړتیا لري چې په ترڅ کې یې د خلکو رایو ته درناوی وشي.
اغلې یوسفزۍ په خپلې اېکس پاڼه لیکلي:« زه نن د تل په څېر په دې باور یم، چې موږ باید د رای ورکوونکو پرېکړه په ورین تندي ومنو او د هغو درناوی وکړو.»

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ