جیونیوز راپور ور کړی، چې د مسلم لیګ نواز او د پاکستان پیپلز ګوند مشرانو شهباز شریف او اصف علي زرداري په مرکز او پنجاب کې د ایتلافي حکومت پر جوړولو هوکړه کړې ده.
د راپور له مخې، د دواړو ګوندونو مشرانو پرېکړه کړې، چې په راتلونکو غونډو کې د واک د وېش فورمول نهايي کړي.
په دغه راپور کې ویل شوي، چې د دواړو ګوندونو مشرانو د پنجاب د سرپرست اعلی وزیر محسن تقوي په کور کې شاوخوا ۴۵ دقیقې خبرې وکړې او د پاکستان لپاره یې په ګډه د کار کولو هوکړه وکړه.
جیونیوز د خپلو سرچینو په حواله لیکلي، چې شهباز شریف د پاکستان د پیپلز ګوند له مشرانو غوښتي، چې په پاکستان کې د سیاسي او اقتصادي ثبات لپاره له مسلم لیګ نواز ګوند سره خبرې وکړې.
سرچينې زياته کړې، چې د دواړو ګوندونو مشرانو د ايتلافي حکومت پر جوړېدو هوکړه او پرېکړه يې وکړه، چې په راتلونکو ناستو کې به پر دې خبرې کوي، چې واک څه ډول وېشل کېږي او څوک به په کومو ساحو او برخو کې کار کوي.
دوی د پاکستان له نورو ګوندونو هم وغوښتل، چې د خپل هېواد د ژغورلو لپاره د ایتلافي حکومت پر جوړولو موافقه وکړي.
په داسې حال کې، چې تر اوسه وروستۍ پایلې نه دي اعلان شوې او د ۹۰ سلنه پایلو له مخې خپلواک نوماندان مخکښ دي، د مسلم لیګ ګوند مشر نواز شریف پرون د خپلو پلویانو په منځ کې راڅرګند شو او خپله بریا یې اعلان کړه.
دا په داسي حال کې ده، چې د تحریک انصاف ګوند مشر او زنداني شوی پخواني لومړي وزير عمران خان هم ادعا کړې، چې د ده د ګوند ملاتړي نوماندانان د پاکستان په ملي اسمبلۍ کې دوه پر درېیمه څوکۍ ګټلې دي.
د پاکستان د ملي ټاکنو وروستۍ پایلې لا نه دي اعلان شوې.