د هند د بهرنیو چارو وزارت د دوشنبې په ورځ ویلي، چې قطر د هند د سمندري ځواکونو اته پخواني افسران د اعدام د سزا له لغوه کولو وروسته خوشې کړي دي. د اعدام د سزا د لغوه کیدو پریکړه د قطر امیر له خوا د دغو کسانو له نیولو ۱۸ میاشتې وروسته شوې.
د رویټرز خبري اژانس د سرچینو په وینا، دغه کسان اسراییل ته په جاسوسۍ تورن و، که څه هم هند او قطر د دوی په وړاندې دغه تور نه دي تایید کړي. دغه اته هندي وګړي د اکتوبر په میاشت کې په اعدام محکوم شوي وو او په ډسمبر میاشت کې دغه سزا لغوه شوې وه.
د هند د بهرنیو چارو وزارت یو چارواکي خبریالانو ته ویلي، چې د هند لومړی وزیر نریندرا مودي، چې "په خپله یې د دغې قضیې ټول پرمختګونه څارل"، به د فبرورۍ په ۱۴ مه نیټه قطر ته سفر وکړي او د دې هیواد له واکمن شیخ تمیم بن حمد ال ثاني سره به وګوري.
هندي چارواکې ویلي، چې د دغو کسانو له ډلې اوه تنه یې هیواد ته راستانه شوي او چارواکي هڅه کوي چې اتم کس هم بیرته هیواد ته راستون کړي. د دغو کسانو له ډلې ځینو یې نوي ډیلي ته په رسیدو سره سیمه ایزو رسنیو ته ویلي، چې د مودي د مستقیمي مداخلې په پایله کې خوشې شوي دي.
نوي ډیلي، د ۲۰۲۲ کال په اګست کې د دغو کسانو له نیول کیدو وروسته له قطر سره د څو میاشتو لپاره په خبرو اترو بوخت و او دې قضیې د دوحې سره اړیکې ننګولې. قطر، هند ته د طبیعي ګاز یو مهم پلرونکی دی.
دغه کسان چې د یوې خصوصي کمپنۍ له خوا ګمارل شوي وو، د قطر د سمندري ځواکونو لپاره یې د یو شمیر پروګرامونو او فعالیتونو د ملاتړ لپاره کار کاوه.
په قطر کې له اته لکو څخه ډیر هندي وګري ژوند او کار کوي.
