د طالبانو د حکومت ویاند وایي، امریکا په افغانستان کې د خپلو مداخلو خوند څکلی او په تېرو شلو کلونو کې یې پایلې ترلاسه کړې دي. ذبیح الله مجاهد د امریکا د بهرنیو چارو وزارت د ویاند وروستیو څرګندونو ته په اشاره زیاتوي، دغه هېواد باید له تېر زدکړه وکړي او بیا پر ناسمه لار ولاړ نشي.
د نوموړي تر څرګندونو مخکې متیو مېلر افغانستان انټرنشنل ته ویلي وو، چې طالبان به د افغانستان په راتلونکي کې یوازیني لوبغاړي نه وي.
خو ښاغلي مجاهد د متیو میلر د خبرو په ځواب کې وايي، که څوک یې خوښوي او که نه، دا ډله د افغانستان او خلکو استازیتوب کوي.
ذبیح الله مجاهد نن د طالبانو تر واک لاندې ملي راډیو سره په مرکه کې زیاته کړه: «که څوک دا موضوع خوښوي او که نه، دا یو حقیقت دی او باید ومنل شي.»
د امریکا د بهرنیو چارو وزارت ویاند تر دې مخکې افغانستان انټرنشنل ته ویلي وو، چې د دوحې ناسته کې د طالبانو نه ګډون د حيرانتيا خبره نه ده، ځکه دغه ډله بېلابېل اهداف تعقیبوي.
متیو میلر وویل: «موږ داسې افغانستان غواړو، چې ټول شموله بنسټونه پکې وي او د افغانانو بېلابېلې ډلې پکې استازیتوب وکړي.»
طالبان د دوحې په غونډه کې ګډون نه درلود.
دا غونډه د ملګرو ملتونو تر څارنې لاندې د ۲۵ هېوادونو او درېیو نړیوالو سازمانونو د استازو په حضور کې جوړه شوه.
