وروسته له هغې چې په پاکستان کې د اېکس پر فعالیت بندیز ولګېد او یو شمېر بنسټونو دا عمل وغانده، د پاکستان د اطلاعاتو لنډ مهالي وزیر مرتضی سولنګي په یوې خبري غونډې کې ویلي، چې پاکستان به په ټولنیزو رسنیو کې د بې اساسه، دروغو او جعلي پروپاګند اجازه ورنه کړي.
هغه وویل، چې په پاکستان کې فېسبوک، ټویټر او انسټاګرام د پروپاګند او د حکومتي چارواکو د شخصیت وژنې لپاره کارول شوي.
نوموړي د کومې ډلې یا حزب نوم نه دی اخیستی؛ خو ویلي یې دي، چې ځینې کړۍ د پاکستان د حکومت په تړاو په ټولنیزو رسنیو کې د بیان له ازادۍ څخه په استفادې نادرست تبلیغات کوي.
مرتضی سولنګي وويل، چې دوی به اجازه ورنه کړي، چې د پاکستان د امنیتي ځواکونو، عدالي ارګان او ورونو هېوادونو پر وړاندې په ټولنیزو شبکو کې بې ځایه او له بې ادبۍ ډک تبلیغات وشي.
وروسته له هغې چې په پاکستان کې د فېبرورۍ ټاکنې ترسره شوې، په ټولنیزو شبکو کې د حکومت او ټاکنو کمېسیون پر وړاندې د شویو درغلیو پر ضد پراخ اعتراضات پیل شول.
د پاکستان حکومت له تېرو شپږ ورځو راهیسې په پاکستان کې پر اېکس شبکې بندیز لګولی او خلک نه شي کولی، چې په اسانۍ سره اېکس وکاروي.
دغې چارې د بیان ازادۍ او انساني حقوقو د یو شمېر مدافع بنسټونو غبرګونونه راپارولي او دا یې د انساني حقونو سره په ټکر کې عمل ګڼلی دی.