د طالبانو د بهرنیو چارو وزرات په افغانستان کې د ملګرو ملتونو د ځانګړې ادارې یا یوناما د مشرې په حواله وايي، ملګري ملتونه د ځانګړي استازي په ټاکلو کې داسې څه نه کوي چې اړیکې یې له طالبانو سره پیچلې شي. طالبان وايي روزا اوتنبایوا دا خبره له امیرخان متقي سره لیدنه کې کړې ده.
دغه وزارت نن د یوې خبرپاڼې په خپرولو سره ویلي، چې د یوناما مشرې روزا اوتنبایوا د طالبانو د بهرنیو چارو له وزیر امیر خان متقي سره د دوحې د وروستۍ ناستې د همغږي کوونکي پر ارزونې او وړاندیزونو او همدارنګه د طالبانو او ملګرو ملتونو ترمنځ د راتلونکي تعامل په اړه خبرې وکړې.
د طالبانو د بهرنیو چارو وزارت د مېرمن اتنبایوا له قوله لیکلي، د ملګرو ملتونو سرمنشي ټینګار کړی چې له «افغان حکومت سره باید سلامشورې وشي.»
د خبرپاڼې له مخې، په دې کتنه کې امیر خان متقي بیا ویلي، چې د دوحې ناسته یې له نږدې څارله او دې ناستې کومه ځانګړې پایله نه درلوده.
ښاغلي متقي ویلي، چې د ناستو د موثریت لپاره باید له کابل سره پر وخت د ټولو مسایلو په اړه هراړخیزې سلامشورې وشي.
دغه وزارت د یوناما د مشرې په حواله همداراز لیکلي، چې که د دوحې د ناستې ګډونوال هېوادونه سره سلا شي، د افغانستان په اړه به نورې ناستې هم وشي.
مېرمن اتنبایوا ویلي، چې د دوحې ناستې ګډونوالو له طالبانو سره د تعامل پر دوام ټینګار کړی.
دا په داسې حال کې ده، چې د افغانستان لپاره د ملګرو ملتونو له لوري د ځانګړي استازي له ټاکل کېدو سره طالبان مخالف دي.
د دوحې ناسته د روانې اونۍ د یکشنبې او دوشنبې په ورځو د سیمې په ګډون د نړۍ د ۲۵ هېوادونو د استازو په حضور سره ترسره شوه.
په دې غونډه کې طالبانو د خپلو شرطونو د نه منل کیدو له امله برخه وانخیسته.
