پاکستانۍ رسنۍ اکسپرېس ټربیون راپور ورکړی، چې د پاکستان او افغانستان د سوداګرۍ د ګډې خونې د یوې سروې له مخې په ۲۰۱۰ کال کې د دغو دواړو هېوادونو ترمنځ سوداګري ۲.۵ مېلیارده ډالره وه؛ خو په ۲۰۲۲-۲۰۲۳ کلونو کې دا کچه ۱.۶ مېلیارد ډالرو ته راټیټه شوه.
افغانستان ته د پاکستان په صادراتو کې حبوبات، بوره، سبزیجات، میوې، مغز، د خټکي او لیمو پوستکي، مالګه، سلفر، ډبرې، نباتي غوړي، پلاستیک او د هغه توکي، درمل جوړوونکي توکي، لرګي او د لرګیو توکي، اوسپنه او فولاد شامل دي.
له افغانستانه پاکستان ته وارداتو کې انځر، انګور، بادام، پیاز، مڼې، لوبیا، پنبه او ګران بیه ډبرې شاملې دي.
د پاکستان او افغانستان د سوداګرۍ ګډ همغږی کوونکی ضیاالحق سرحدي وایي، چې تر سياسي بدلونونو مخکې وضعيت ښه و؛ خو د قبايلي ولسواليو له يوځاى کېدو او د پوليسو د نظام له پلې کېدو وروسته په تورخم کې د بډې اخیستنه هم زیاته شوې ده.
هغه يادونه وکړه، په تېرو کې چې د تورخم دروازه د لسو ورځو لپاره تړل شوې وه له امله يې د پاکستان او افغانستان دواړو حکومتونو ته د ٨٨ مېليارده ډالرو په ارزښت مالي زيانونه اوښتي وو.
اوسمهال تر ټولو لویه ستونزه پر دغه لار د موټر چلوونکو د پاسپورټ او ویزو ده، ډېری دغو موټر چلوونکو ته د ویزو پرځای د کارتونو د ورکړې غوښتنه هم شوې ده.