د افغانستان لپاره د امریکا ځانګړي استازي توماس وېسټ په اېکس پاڼه واشنګټن ته د هغه د ستنېدو خبر ورکړی او ترڅنګ یې د ملګرو ملتونو سرمنشي څخه د ناستې د رابللو لپاره او د قطر دولت له کوربهتوبه هم مننه کړې ده. هغه لیکلي، په افغانستان کې د ټولیزو ګټو په اړه پیاوړې اجماع شته.
د هغه په وینا، هیڅ هېواد نه غواړي چې له افغانستانه ورته د ترهګرۍ ګواښ پېښ شي.
هغه وایي، ټول هېوادونه غواړي چې ښځې او نجونې ښوونځيو، پوهنتونونو، کار او عامه ژوند ته راستنې شي.
هغه زیاته کړې:« د اقتصاد په اړه، د افغانانو روښانه ژمنې واورېدل شوې او په تېر کال کې له ۲۶ مېلیونو څخه زیاتو افغانانو ته د بشري مرستو رسولو په برخه کې د نړۍوالو هڅو بیاکتنه وشوه.»
ښاغلي وېسټ لیکلي، د پایښت په اړه هم اندېښنه د یوې داسې تګلارې رامنځته کولو ته اړتیا لري چې افغانانو ته د دوی د اقتصادي راتلونکې مالکیت ورکړل شي.هغه وایي، ډېری هېوادونو د طالبانو لهخوا پر کوکنارو د بندیز پلې کول ومنل چې د یو اېن او ډي سي» د ارزونې له مخې د کوکنارو د کرکېلې کچه ۹۵ سلنه کمه شوې.
د هغه په وینا:« موږ د هغو کروندګرو لپاره د نړۍوال ملاتړ بیاکتنه وکړه، چې د بدیلو فصلونو او د روږدو کسانو د رغولو په لټه کې دي؛ خو لا هم ډېرې همغږۍ ته اړتیا شته.»
هغه وایي، چې په افغانستان او بهر کې د افغان مدني ټولنې د ګډون کوونکو سره یې د اقتصادي او بنسټیزو اړتیاوو، بشري حقونو ته د درناوي پر اهمیت او د طالبانو په ګډون د افغانانو سره د تعامل د اړتیا پر دوام هم خبرې وشوې.
هغه د خپلې لینکې په وروستۍ برخه کې لیکلي، چې په راتلونکو ګامونو کې، متحده ایالات د دې بڼې د دوام هرکلی کوي او همدارنګه د ملګرو ملتونو په مشرۍ د پروسې د دوام غوښتنه کوي؛ ترڅو په نړۍوال سیسټم کې د افغانستان بشپړ ادغام لپاره د لارې نقشه جوړه کړي.
