د روغتیا نړېوال سازمان وايي، د افغانستان په ننګرهار کې یې له غوماشو څخه د خوندیتابه په پار یې ۲ لکه ۷۰ زره جالۍ وېشلې چې د دوی په خبره په دې سره به خلک د ملاریا او ډینګي غوماشو د چیچلو له ګواښه خوندي شي. دغه سازمان وايي، وېشل شوې جالۍ کولای شي د اوږده مهال لپاره غوماشي ووژني.
د روغتیا نړېوال سازمان نن پنج شنبه د (کب لسمه) په ایکس پاڼه لیکلي چې دغه دوه لکه او ۷۰ زره جالۍ یې په ننګرهار کې په خلکو ويشلې دي.
په افغانستان کې له تېرو درېیو لسیزو راهیسې د اوړي په موسم کې د ملاریا ناروغۍ رامنځته کیږي چې روغتیاپالان یې لامل له ناولو او ډنډ شویو اوبو څخه د غوماشو پیدا کېدل ګڼي.
خو په دې وروستیو کې له ګاونډي هیواد پاکستان څخه یو بل ډول غوماشی چې د ډینګي په نامه یاديږي هم د ډیورنډ کرښې ته څېرمه د افغانستان په ځینو ولایتونو کې پیدا شوی.
ويل کیږي د ډینګي غوماشی بیا د ملاریا د غوماشي برعکس له پاکو اوبو پیدا کیږي چې دغه ناروغي سخته تبه او د هډوکو درد لري چې ډیری ناروغان د سختې تبې له امله مړه کیږي.
کابو یوه نیمه میاشت وړاندې د روغتیا نړیوال سازمان ویلي و چې له جاپان سره په ګډه یې په افغانستان کې د ساري ناروغیو سره د مبارزې په برخه کې د ۶،۹ میلیونو ډالرو پروژه لاسلیک کړه.
ډبلیو ايچ او ویلي و چې د جاپان د همکاریو نړیوال سازمان (جایکا) سره به د ساري ناروغیو په دغه ګډه پروژه کې له ۷۶ زره څخه زیاتو افغانانو ته خدمتونه وړاندې کړي.
د جاپان د همکاریو نړیوال سازمان استازي کیوشي امادا د یادې ګډې پروژې د لاسلیک پرمهال ویلي و چې: «زه هیله لرم چې دا پروژه به د میندو، ماشومانو او نورو په ګډون د خلکو روغتیا ته اغیزمنه تمامه شي او د دوی ژوند به خوندي کړي چې په افغانستان کې له بشري امنیت سره مرسته وکړي.»
