د افغانستان له خبریالانو د ملاتړ ټولنه وایي، چې د دوحې تر غونډې وروسته طالبانو د رسنیو پر وړاندې نوي بندیزونه لګولي چې تر ډېره یې د خلکو او رسنوالو تر منځ اندېښنې ډېرې کړې دي.
دغه ټولنه وایي، په دې وروستیو کې پر رسنیو د طالبانو د امر بالمعروف او نهي عن المنکر څار او تفتیش زیات شوی او د ګڼو نورو سانسورونو ترڅنګ یې په رسنیو کې د ښځینه خبریالانو پر حضور، کار، خبرو، پوښښ او کاري شرایطو نوي بندیزونه لګولي دي.
طالبانو په ځینو رسنیو کې د ښځینه خبریالانو لپاره مکلفیت وضع کړی، چې یوازې یې باید دوه سترګې ښکاره شي او نورې دې بشپړې په حجاب کې وي.
د افغانستان له خبریالانو د ملاتړ ټولنې په خپرو شویو خبرپاڼو کې ویلي، چې د دوحې په ناسته کې د طالبانو د شرایطو نه منل کېدل او د دوی لهخوا په ناسته کې نه ګډون ښيي، چې دوی له نړۍوالې ټولنې سره په مخالفت کې د مدني بنسټونو، رسنیو او افغان ښځينه خبریالانو په کار محدودیت او فشارونه زیات کړي دي.
له افغان خبریالانو د ملاتړ سازمان دغه نوی بندیز یو استبدادي او ظالمانه چلند بللی او له دې امله یې د اعتراض غږ پورته کړی دی.
دغه سازمان په نړۍوالو سازمانونو او ټولنو غږ کړی، چې له خپلو ټولو امکاناتو سره دې په افغانستان کې دننه د فعالو رسنیو او هلته پر کار بوختو مېرمنو او نجونو تر څنګ ودرېږي او اجازه دې ورنکړي، چې د بیان د ازادۍ او انساني حقونو دغه روستنۍ ډېوې هم مړې شي.
دا رنګه د دوحې له ناستې وروسته طالبانو د افغانستان په بېلابېلو ولایتونو کې د اعدامونو لړۍ هم چتکه کړې او په ډېرو نورو ولایتونو کې یې مجرمینو ته د درو وهلو سزاوې هم ورکړې دي.
