د طالبانو تر کنټرول لاندې باختر اژانس د غزني د اطلاعاتو او فرهنګ رییس له قوله لیکلي، چې د روان لمریز کال له پیل تر اوسه ۲۹۳ بهرني سیلانیان غزني ته په چکر ورغلي دي. ملا حميدالله نثار زیاتوي، د دغو سیلانیانو ډېره برخه د روسیې، ایران، چین، سویلي کوریا او اروپا اوسېدونکي جوړوي.
د باختر اژانس د ننني د راپور پر بنسټ عزني ته تللیو بهرنیو ګرځندویانو کې چې ښځې هم شاملې دي، د غزني تاریخي ځایونو او د طبیعي منظرو لیدنه یې کړې ده.
په غزني کې د طالبانو د ډلې د اطلاعاتو او کلتور ریيس ملا حميدالله نثار ویلي، چې په هېواد کې د سرتاسري امنیت ټینګښت د ګرځندويي کلتور د غوړېدو سبب شوی دی.
دوی وايي پرون هم د انګلستان، استرالیا، هندوستان او امریکا ۶ ګرځندویان غزني ته رسېدلي دي.
طالبان په داسې حال کې د بهرنیو ګرځندویانو د زیاتېدو خبره کوي، چې د جرمني په کډون یو شمیر بهرنیو هیوادونو له خپلو اتباعو غوښتي، چې د امنیتي ستونزو له دې دغه هیواد ته سفر نه کوي.
د راپورونو پر اساس د طالبانو یو شمیر بهرني وګړي، چې افغانستان ته تللی وو، د نامعلومو دلایلو له امله زنداني کړي دي.
