د طالبانو بهرنیو چارو وزارت په پاکستان کې د وروستیو ورښتونو او تندر له امله په دغه هېواد کې پر ځاني او مالي زیان خواشیني ښيي او وايي، د پاکستان حکومت او قربانیانو ته تسلیت وايي. پاکستان کې اوسني ورښت تر ډېره بلوچستان او پښتونخوا کې تاوان رسولی دی.
د طالبانو بهرنیو چارو وزارت ویاند عبدالقهار بلخي خپل اېکس کې ویلي، چې دغه ډله د اوښتو ګڼو ځاني او مالي زیانونو په اړه د پاکستان حکومت، ولس او په ځانګړي توګه د قربانیانو کورنیو ته د تسلیت د مراتبو په وړاندې کولو سره خپله ژوره خواخوږي څرګندوي.
هغه زیاته کړې: “د الله متعال له دربار څخه شهیدانو ته جنتونو او ټپیانو ته د عاجلې شفاء غوښتنه کوي.”
د پښتونخوا د مرکز پېښور په ګډون په دغه ایالت کې د څلورو پرلپسې ورځو د بارانونو له امله د راوتلو سیلابونو په پایله کې ۳۳ کسان مړه شوي او ۳۱ نور ټپیان شوي دي.
د پښتونخوا په څنګلوري بلوچستان کې هم د لسو کسانو د مړینې رپوټ ور کړل شوی دی.
د پاکستان د هوا پوهنې اداره وايي، د اپرېل تر وروستیو به د توپان او باران دوه څپې په دغه هېواد کې روانې وي.
