د طالبانو د عامې روغتیا وزارت وایي، چې د ترکي ډاکټرانو یوه ډله په اتاترک روغتون کې د وړیا عملیاتو د ترسره کولو په موخه کابل ته راغلې ده. د ترکي رسنیو د راپور له مخې، دغه ډاکټران به د ثور میاشتې تر اوومې پورې د جراحۍ معاینات او عملیات وکړي.
دغه وزارت د پنجشنبې په ورځ (د وري ۳۰مه) د یوې خبرپاڼې په خپرولو سره ویلي، چې یاد ترکي ډاکټران به د عملیاتو ترڅنګ د یورولوژي اختلاطي عملیاتو د ترسره کولو د څرنګوالي په برخه کې افغان ډاکټرانو ته روزنه هم ورکړي.
ترکي رسنیو لیکلي، په دغه ډله کې د دوو جراحانو، د جراحانو د دوو مرستیالانو، یو متخصص، د بې سده کولو د دوو مرستیالانو او د عملیات خونې د دوو نرسانو په ګډون ۹ کسان شامل دي.
دغه ډاکټران به د ثور میاشتې په څلورمه نېټه د اتاترک په روغتون کې د درملنې لاندې ماشومانو ته یو ځانګړی پروګرام هم جوړ کړي.
د ویلو ده، چې تر دې وړاندې د روغتیا نړۍوال سازمان ویلي و، چې په افغانستان ۱۸ میلیونه کسان روغتیایي خدمتونو ته اړتیا لري.
اخوا، د بونېسف د شمېرو له مخې په افغانستان کې څه باندې ۹ میلیونه کسان روغتیایي خدمتونو ته لاسی نه لري.
