د طالبانو د کورنیو چارو وزیر ویلي، چې د نجونو د زده کړې مساله په دې ډلې پورې اړه لري او طالبان به ورته زمینه برابره کړي. د باختر اژانس د خبر له مخې، سراج الدين حقاني ويلي دي، چې طالبان به د نړۍ "فرمایش" ونه مني.
حقاني ټینګار کړی: «زده کړه زموږ ماشومانو پورې اړه لري او هېڅوک زموږ په پرتله زموږ پر ماشومانو زړه سوانده نه دي.»
د طالبانو تر کنټرول لاندې باختر خبري اژانس د شنبې په ورځ (د غویي لومړۍ نیټه) خبر ورکړ چې ښاغلي حقاني په اروپا کې له مېشتو افغان روڼ اندو سره کتلي.
د دغه راپور له مخې، سراج الدین حقاني ویلي، چې طالبان له نړیوالې ټولنې سره د متقابل احترام پر بنسټ اړیکې غواړي او زیاته کړې یې ده، چې د دې ډلې مشر ملا هبت الله په خپل اختریز پیغام کې نړۍ ته د ښو اړیکو بلنه ورکړې ده.
ښاغلي حقاني وویل، چې نړۍ باید دا حقیقت ومني او ورسره عادت شي چې افغانستان یو خپلواک هېواد دی. هغه زیاته کړې، چې طالبان د نورو هېوادونو په کورنیو چارو کې لاسوهنه نه کوي او دا نه مني، چې نور دې دوی ته "فرمایش" ورکړي. د حقاني شبکې مشر ټینګار کړی، چې طالبان به هغه فرمایشونه ونه مني، چې د دې ډلې له ملي حاکمیت سره په ټکر کې وي.
حقاني په دې ناسته کې ټینګار وکړ چې «افغانانو له څو لسیزو سختې مبارزې وروسته خپل اساسي اهداف ترلاسه کړي دي». هغه «آزادي، د وطن مالکیت او د اسلامي نظام ټینګښت»د افغانانو د اساسي اهدافو په توګه یاد کړي دي.
وروسته له هغه چې طالبانو په ۱۴۰۰کال کې افغانستان کې واک تر لاسه کړ، له شپږم ټولګي پورته یې د نجونو ښوونځي وتړل او پوهنتون ته یې د نجونو د تګ مخه ونیوله. دغې ډلې په نادولتي ادارو کې ښځې له کار کولو منع کړې او د ګڼو فرمانونو په صادرولو سره یې پر ښځو پراخ بندیزونه ولګول.
د ښځو پر وړاندې د طالبانو د محدودیتونو له امله د بشري حقونو سازمانونه وايي، چې دغې ډلې جنسیتي توپیر رامنځته کړی او ښځې یې له ټولنې ګوښه کړي دي.
په تېرو نږدې درېیو کلونو کې نړیوالې ټولنې له طالبانو غوښتي چې د نجونو ښوونځي بېرته پرانیزي او پر ښځو لګیدلي بندیزونه لرې کړي. خو طالبانو د نړیوالې ټولنې غوښتنو ته پام نه دی کړی.
