د طالبانو د ټرانسپورټ او هوایي چلند وزارت د هواپوهنې ریاست نن یکشنبه (د غویي دویمه نېټه) د سالنګونو په ګډون د افغانستان په ۱۹ ولایتونو کې د واورې، شړکنده باران، تالندې او سېلابونو د راوتو وړاندوینه کړې ده.
د دغه وزارت د خبرپاڼې له مخې، دغه وړاندوینه د سالنګونو په ګډون د ننګرهار، لغمان، کاپیسا، پروان، پنجشیر، بغلان، تخار، بدخشان، کابل، میدانوردک، بامیان، دایکندي، روزګان، زابل، غزني، پکتیکا، خوست، پکتیا او لوګر ولایتونو لپاره شوې ده.
له بل پلوه په تېرو وروستیو کې سختو ورښتونو په افغانستان کې خلکو ته ګڼ مالي او ځاني زیانونه اړولي دي.
تېره ورځ د طالبانو پېښو ته د رسېدو وزارت ویاند ویلي، له تېرو دوو ورځو راهيسې پرله پسې سېلابونو په لسو ولایتونو کې ۲۹ کسان مړه او ۷ نور ټپیان کړي دي.
ملا جانان سایق د هواپوهنې ادارې د معلوماتو له مخې خلکو ته د نورو ورښتونو او بارانونو خبرداری ورکړی او د ځان ساتنې غوښتنه یې ترې کړې وه.
څلور ورځې وړاندې د طالبانو پېښو ته د رسېدو وزارت ویاند ملا جانان سايق ويلي و، چې تر دا مهاله سېلابونو ۶۶ کسان مړه کړي او ۳۶ نور يې ټپيان کړي دي.
