د طالبانو د ریاست الوزرا اداري مرستیال عبدالسلام حنفي د اسلامي همکاریو سازمان له مرستیال طارق علي بخیت او د هغه له مل پلاوي سره وکتل. ښاغلي حنفي په دغې لیدنه کې له دغه پلاوي غوښتي، چې د ګامبیا په ناسته کې باید دوی ته هم بلنه ورکړل شي.
د طالبانو تر کنټرول لاندې ملي ټلویزیون په اېکس پاڼه د ښاغلي حنفي له قوله لیکلي، چې نوموړي په دغې لیدنه کې له دغه پلاوي غوښتنه کړې، چې د افغانستان رېښتینی انځور دې نړۍ ته وړاندې کړي.
ښاغلي حنفي د دغه سازمان سره د اړیکو پر لاپیاوړتیا ټینکار کړی او ویلي یې دي، چې په ګامبیا کې باید د دغه سازمان په راتلونکې ناسته کې د دوی ډله هم وبلل شي؛ څو د دغه سازمان لامشورې واوري او هغوی د افغانستان له شته واقعیتونو باخبره کړي.
ورته مهال د دغه سازمان پلاوي هم د افغانستان سره د خپلو همکاریو ډاډ ورکړی.
دغه پلاوي ویلي، تمه کېږي چې له دوو نړۍوالو موسسو سره د افغانستان او نورو اسلامي هېوادونو ته د مرستو لپاره هوکړه لیک لاسلیک شي.
